About me

Gebore bin ich am 22. Januar 1987 in Basel. Dört bin ich ufgwachse und wohn au hüt no dört. D'Schuel han ich im Summer 2006 erfolgrich abgschlosse, ich glaubs hüt no gar nonig richtig und freu mi eifach drüber! Ich mach zur Zyt grad es Zwüschejohr mit diverse Praktika und sogar miteme Sprochuffenthalt in Australie, wil mini Usbildig erscht nöggscht Johr afangt.

Mini Hobbies sin de Tierpark Lange Erlen in Basel, wo ich sehr viel Zyt verbring, dört betreu ich d'Erlekids und d'Ponies und Esel. Ich tue aber au gern Sport mache. Schwimme und Jogge mit Vitaparcours hani grad letschti agfange regelmässig z'mache. Ich mach aber au gern Volleyball und Fuessball mit Kollege und ritte tue ich au gern, aber leider nüm regelmässig... Singe tue ich au no mega gern, ich freu mich, dass ich das sogar innere Band dörf mache. Und natürlich tue ich au sehr gern shoppe! Vorallem aber Schueh, do muess ich scho sehr ufpasse, dass ich nit z'viel kauf. Ich muess mi immer ermahne, dass ich jo kein Tuusigfüessler bin. Komischerwies han ich aber nur wiessi, schwarzi und bruuni Schueh :-)

Durch mini neui Digitalkamera mach ich sau gern fötteli und würd d'Kamera am liebschte überall mitneh. Mini liebschte Objekt sin aber immer no d'Esel!

Wenn du de Teggscht jetzt ufmerksam glese hesch, wirsch du merke, dass s'Wort "ESEL" mehreri mol vorko isch. Esel sin mini absolute Lieblingstier. Mehr drüber findisch aber uf de seperate Siete!