Archiv

News

Hallo mini Liebe!!

Wie es euch wohl goht? Mir goht's mehr oder weniger guet. Es isch halt alles wieder neu fuer mi und ich muess mi no ilebe, bruch no Zyt.

Vom 23.12. bis 01.01. bin ich mit mine Verwandte an de Sunshine Coast in Coolum gsi. Doert haemmer Wiehnachte gfiert. Es isch sehr schoen gsi, au wenn ich gar nit in Wiehnachtsstimmig gsi bi. Unsere Baum isch sehr kitschig gsi. Ich han no nie so viel Gschenkli unter emene Baum gseh, und mir haen dreimol Gschenkli drunter do, wil mir mehrmols gfiert haen (mit andere Luet). Jedes Familiemitglied het es Shirt aka, miteme Wiehnachtsslogan druff (HOHOHO...), und mir Fraue haen zuesaetzlich no so Rentierhoerner mit Gloeckli oder Laempli dra aka. Es isch mega luschtig gsi!! Nach dem mir denn am Mentigmorge Geschenkli uspackt haen, simmer an Strand gange. D'Welle sin mega gross und kraeftig gsi, aber mti de Zyt hani mini Angscht verlore. Mi Goetti und ich mir haend es Boogieboard debi ka, das isch so es churzes Brett, aehnlich wie e Surfboard, nur dass me druf liet. Das het mir grosse Spass gmacht und je groesser d'Welle, desto schneller isch me mit dem Brett. Fuer mi isch denn klar gsi, ich woett unbedingt surfe lerne. Am noeggschte Dag haen mi Goetti, ich und no oepper anders vo de Familie e Surfstund ka! Das isch sooooo laessig gsi,d as glaubed ihr gar nit!! Und s'Wetter isch voll bewoelkt gsi, d'Welle sin no hoecher gsi als am Dag vorher und es het Qualle im Wasser ka! Es isch wuerklich nit amaechelig gsi, aber e Surfe goht halt glich ins Wasser! Ich han nach em surfe ganz roti, offeni Knie und Bei ka, wil das Brett so ruch gsi isch und am Dag druff hani mi paar Joehrli aelter gfuehlt... :-) Paar Daeg spoeter haen mi Goetti und ich es Brett gmietet, aber die haen uns z'Kleini Bretter geh, so das mir abgsoffe sin, wenn mir probiert haen ufzstoh und wil die nuemi bi de Huette gsi sin, haemmer nit wechsle choenne. Das isch sehr schad gsi. Aber au allgemein sin d'Bedingige zum Surfe nit so guet gsi, wie am andere Dag. Ich han an de Sunshine Coast au choenne go Fliege. De Vater vo miner Tante isch Pilot und denn haemmer so es chleins Flugzueg (Cessna?) choenne miete und go fliege. Dasisch was vom schoenschte gsi, wo ich je gmacht han. Ich han mi so in die Sache verliebt, wo ich gseh han waehrend em Fliege. Mir sin vom Flugplatz zu unserem Appartment gfloge und denn de lange Kueschte entlang uf Noosa. S'Wasser isch so schoen hellblau gsi und so klar. Mir haen Delfin gseh und ich han no e Roche gseh und suescht het's no grossi Fisch ka, wo mir nit haen choenne definiere. Han ganz vieli Bildli gmacht! Und s'tolle isch gsi, wo ich uf Airlie Beach greist bin, bin ich wieder ueber d'Sunshien Coast gfloge, nur halt hoecher, aber ich han alles nomol richtig in mi ine suuge choenne :-) Mir sin au mol go Rockpools aluege, also due Tuempeli wos zwuesche de Felse git, wenn Ebbe isch. Doert haemmer ganz vieli Krabbe gseh, die sin so blau und bruun gsi, han no nie soenigi mit so Farbe gseh! Uns isch denn aber d'Freud vergange, wo mir fascht vomene Stei troffe worde sin, wo irgend so en Depp wohl gworfe het... So, ihr froget euch sicher: Wie isch wohl de Sarah ihre Silveschter gsi?? Tja, ich muess euch enttuesche, ich chan nit viel brichte, hans naemlig verschlofe... De Nigel (Vater vo miner Tante), mi Goetti und ich mir sin am Morge vom 31.12. am drei ufgstande und sin mitem Boot usegfahre zum go fische. Das isch sehr schoen gsi, aber au astrengend. Mir haen ganz viel Fisch gfange (die haen wohl hunger ka...), aber wil sie z'klei gsi sin haemmer alli usser eine wieder muesse zrugg werfe! Die Fisch sin soooo schoen gsi, so richtig bunt oder mit viel Zacke. Mir haen au Schildkroete gseh und no so richtig grossi Qualle mit Tentakle. Und paarmol isch e Schwarm mit riesige Fisch an unserem Boot verbi gschwumme, mega schoen!! Mir haen denn am Nomidag chli gschlofe, aber schienbar nit gnueg, ich jedefalls nit! Zobe haemmer am Beach no Fish und Chips gaesse, haens Fuerwerk agluegt wo am achti gsi isch, haen chli was trunke und Scharade gspielt (Pantomime...). Am zehni simmer zrugg ins Appartment, ich bi anegsesse und sofort weggsi... Am Morge vom 01.01. haen mi mini Tante und mi Goetti uf Brisbane zum Flughafe brocht und ich bi denn uf Proserpine gfloge. De Airport isch so chlei, das gits gar nit! Links und rechts vo de Pischte hets Wald und unser Flugi isch s'einzige gsi. Es anders haett gar niene Platz ka. Das isch vo Vorteil gsi, ich han grad s'Schildli mit mim Name druff gseh und so min Host-Dad troffe. Zaemme simmer denn nach Cannonvale, mim jetzige deheim gfahre. Uf em Weg hani ganz vieli toti Kaenguruhs uf de Stross gseh. :-( S'Huus isch mega neu aber klei. Mi erschte Idruck vom Zimmer: Schuehschachtel... jetzt isch es chli besser!! Aber so japanisch, wil die vor mir isch Japanerin gsi und die chuntn in paar Moenet wieder... Sie haen en Papagei, wo miner meini mega schoen isch, aber voll luut!! De Fernseh lauft immer und er trinkt mega viel Bier. Aber mini Host-Eltere sin mega nett und das machts mir chli eifacher, mich izgwoehne. D'Schuel isch mega klei, isch ganz anders in Wuerklichkeit als uf de Bilder. Die andere Studente sin ok. Ich bin eini vo de juengschte und die einzig wo s'First Certificate of English macht! Jetzt fangt denn d'Schuel a, bricht spoeter mehr!! Haend jo glaubs gnueg z'lese fuer de Moment!! ;-)

Machets guet, hebet sorg!!

Sarah

 

1 Kommentar 4.1.07 23:29, kommentieren

More News

So, d'Schuel isch umme fuer Huet. Ich nimm mir chli Zyt, zum euch chli meh z'brichte...

Letscht Wuche isch am Beach es Chai Tent gsi. Jugendlichi vo de ganze Welt haen gratis Tee serviert, live Musik gspielt und me het mit ihne rede und spieli mache choenne. Das ganze het mir aber vorallem so guet gfalle, wil die Jugendliche vo "Jugend mit einer Mission" gsi sind. Ich han also die erschte Chrischte doerfe treffe. Ich bi sehr froh drum gsi, wil ich mi so einsam gfuehlt han und in dem Chai Tent ha ich mi grad wie deheim gfuehlt. D'Atmosphaere isch so speziell gsi, eifach schoen. Leider sin die Jugendliche wieder zrugg uf Brisbane... Durch das Chai Tent ha ich usegfunde, wer suescht no Chrischt isch, es sin einigi... :-) Mit einige bini geschter Zobe in d'Kirche gange. Es isch kei Gottesdienscht gsi, aber so e Art Kaffi und oepper het ueber Kambodscha verzellt, er isch doert gsi go Brugge baue in de Slums. D'Luet sin sehr fruendlich gsi in dr Kirche, ich wird uf jedefall wieder go, allerdings am Morge. Ich bi so froh anderi Chrischte troffe z'ha, ich vermiss es so mit andere ueber "Gott und die Welt" z'rede und z'worshippe mit andere zaemme.

Ich bi immer no sehr happy mit miner Gaschtfamilie. Ich verstoh d'Mavic mis Host-Mami immer besser. Sie isch vo de Philippine und am Afang han ich wuerklich fascht kei Wort verstande, wo sie gseit het. Sie kocht mega guet und macht mir immer en mega Lunch parat. Die andere vo de Schuel sin ganz niedisch :-P Muend also kei Angscht ha, dass ich verhungere... s'nimmt mi no mega Wunder, oeb ich scho zuegno han, wil do in Australie han ich immer recht spot z'Nacht gesse und mega viel gaesse...

Paar vo euch wuesse jo, dass ich mi nit so wohl fuehl do. Es isch eifach immer es uf und ab. Ich cha nit saege, wie es mir grad goht, ich weiss es selber nit. Ich bruch eifach no Zyt. Haett nie denkt, dass es so schwer isch...

S'Doerfli isch ganz ok, halt touristisch und mega viel Reisebuero het's, aber au gueti Chleiderlaede. Ich mag de Style do mega, er isch viel lockerer als in de Schwiez.

Leider cha me nach de Schuel gar nit viel mache, usser in es Pub go suffe (was paar Mitschueler mache), oder an d'Lagune go. Das isch so e Art Schwimmbad, aber gratis und es het au chli Sand als Beach. Aber s'Wasser het e recht gruusige Gschmack (Chlor und Salz und no Sache wo ich nit wuesse will!!) Aber nach em zweite Schwumm doert drin het's mir scho besser gfalle. Ok, ich bi am Morge go ritte und de ganz Dag in lange Hose ummegloffe, ich ha es richtig gnosse im Wasser. Ins Meer chame do ebbe nit go bade. Es isch viel z'gfoehrlich wege de Stinger und andere Qualle, wo toedlich sin!

E anderi Studentin het mir gseit, d'Schuel wuerd uf Afang Februar zuegle. Ich han kei Ahnig, oeb das es Gruecht isch... Uf de Foetteli het d'Schuel recht neu usgseh, aber sie isch es nit. D'Bibliothek isch gschlosse, die gits nuem. D'Cafeteria isch au no nie offe gsi, sit ich do bi... Bin gspannt, oeb mir wuerklich zuegle. S'Andere Gebauede isch noecher bi mir deheime und schoen gross...

Jo, ich denk das laengt mol sowiet, viel mehr gits nit z'verzelle...

Machets guet, ich denk viel an euch...

Sarah

 

8.1.07 05:30, kommentieren

Scho wieder e Wuche umme!!

Halli Hallo!!

Es isch jo scho wieder e Wuche umme!!! Wow, d'Zyt goht so schnell verbi, das isch unglaublich!! Ich ha mi besser iglebt und fuehl mi wohler. Ich ha paar "Fruendinne" gfunde, aber es isch alles sehr oberflaechlich. Ich vermiss es eifach mit euch, mini liebi Familie und mini liebe Fruende, z'rede. Was eifach kompliziert isch, isch das meh nit eifach so druff los rede cha, wie deheime, wo alli die glich Sproch rede. Entweder me wird selber nit verstande, oder me verstoht sis gegeueber nit. Das isch sehr schad, aber zum Teil au luschtig, wil me wuerklich mit Haend und Fuess probiert sich z'verstaendige.

Wo ich letscht Wuche heimcho bi vo de Schuel het mi Gaschtfamilie gmeint, dass es Koreanerin zu uns wird cho. Es het kei anderi Familie, wo sie neh cha, wil sie allergisch uf Huend und Chatze isch. Ich han scho angscht ka, dass ich stattdesse zunere Familie mit Huend oder so muess. Aber jetzt sin mir beidi halt bi dere Familie. Es isch eifach chli muehsam, wil mir nur ei Bad haen im Huus und bi vier Persone wirds denns cho chli eng... Ich bi so froh, dass die Familie keini Huend het. Letscht Wuche sin mer zweimol Huend nochegrennt und ich han doch recht schiss ka. D'Luet in unserer Stross sin eigentlich scho fruendlich, aber ebbe, dass mit de Huend soett nti passiere. Falls es doch passiert, darf ich es mim Host-Dad saege und er luetet neume a, und denn werde die Luet kontrolliert und muend viellicht ihri Huend abgeh!!

Am Mittwuchzobe isch unseri Friday-Activity gsi (defuer haemmer am Frittignomidag frei ka...). Mir sin in es Restaurant wo e Trivia Night gsi isch. Das heisst es sin uns 26 Froge gstellt worde, alli fange miteme andere Buechstabe a. Die Froge sin mega schwer gsi, aber mir haen alli Spass ka. Schlussendlich simmer dritti worde. Als Pries haemmer e Verguenschtigung fuer en Usflug beko. Ich freu mi mega druff, mir haen uns fuer Ocean Rafting entschiede. Aber ich muesst miteme Koreaner go und zerscht woetti no paar Meitli motiviere zum mitko...

Am Frittigzobe haen mir Schueler es BBQ bi de Lagune ka. Isch no laessig gsi, aber die andere trinke halt doch chli z'viel Alkohol fuer min Gschmack... Wo ich denn heimcho bin nach de 12 z'Nacht bi ich recht verschrocke, wo ich e schwarze ca. Fuenfliber grosse Schatte in mim Zimmer gseh ha. Nach em zweite Blick ha ich gseh, es isch kei Spinne - Gott sei Dank - aber halt so en Kaefer, ha mir nuet debi denkt. Das Viech isch denn aber doch immer noecher zu mim Bett krabbelt oder grast, also ha ich es use werfe welle us mim Zimmer. Alli Tuere sin scho zue gsi und so, also ha ich es eifach in hinterschte Egge vom Wohnzimmer gworfe... Am noeggschte Dag ha ich das miner Gaschtfamilie verzellt. Jetzt ha ich nit nur e Kaefer im Zimmer ka, sonder e Cockroach, was uf duetsch so viel wie Kuchischabe heisst. Isch also doch besser gsi, dass ich das Ding usegworfe han :-)

Am Samschtig bin ich mitere Brasilianerin, de Carina, uf e 2 Island Cruise. Mir sin uf Hamilton Island und zum Whitehaven Beach. S'Wetter isch leider total sch..... gsi, was uns chli uf d'Luune gschlage het. Hamilton Island isch voll langwielig gsi, wil mir haen z'wenig Zyt ka, zum alles gnau aluege oder zum schwimme. Und denn het's no gheisse, d'Bedingige vom Wetter und Wasser sin zu schlecht, mir choenne nit zum Whitehaven Beach. Mri sin aber trotzdem mit em Schiff denn doert ane und haens probiert. Es isch kei Problem gsi zum Glueck. Doert haemmer trotz wenig Sunne schoen ins Wasser gseh, wo ich no nie in soneme blau erlebt han. Mir haen Roche gseh und no so anderi schwarzi Schatte im Wasser. De Sand an dem Beach isch so soft, das ha ich no nie erlebt, wenn ich s'noeggschtmol doert ane gang, woett ich e Dose mitneh, damit ich chli Sand stibitze chan. Mir haen denn chli badet, aber s'Wasser isch sau chalt gsi. Spoeter hets denn no chli gregnet. Mini Foetteli sin nit so toll worde, d'Sunne het eifach gfehlt... Aber ich wird sicher mitere andere Company nomol zu dem Beach go, wo ein vo de schoenschte uf de Welt si soett. Zobe isch denn d'Koreanerin ako. Es isch ganz e liebi und schuechi, aber mir haens no recht guet zaemme. Mir haen es BBQ deheime ka und im Garte gaesse. Ihr glaubet gar nti, wie verstoche ich bi. Die Moskitos do sin sehr aggressiv!!

Am Sunntigmorge bin ich denn in d'Kirche gange. Isch ganz laessig gsi mit Hillsong Musik :-) D'Luet sin sehr fruendlich gsi. Was ich aber am beschte find, ich doerf noeggscht Wuche in d'Bandprob go ineguexle und chan viellicht denn au mit ihne am Sunntig singe :-)

Huet am Morge ha ich vor em Igang miteme ander Schueler gredet und denn ha ich uf eimol so e Art Blatt an de Wand bemerkt. Jetzt isch das es Insekt gsi, wo wie es gruens Blaettli usgseh het. Ich ha das denn im andere Student gseit und er meint nur:"Ja, das ist das Blatt und an der anderen Wand ist das Aestchen." Ich ha mi umdreiht und an dr andere Wand isch wuerklich so es Viechli gsi, wo wie es Aeschtli usgseh het. Han das mega toll gfunde. Die sin so cool, und ich han leider mini Kamera deheime glo... :-( Huet sin nomol zwei Schwiezer cho, es isch es Ehepaerli, wo scho chli aelter isch und sie sin vo Zueri. Jetzt simmer 7 Schwiezer do und ich wart immer no uf es Girl in mim Alter...

Ich mach mir langsam Gedanke ueber mini Zyt nach em Sprochuffenthalt. Also was ich alles no mache wird, wenn ich wieder zrugg bi mine Verwandte in Brisbane bin. Ich han no paar Sache, wo ich doert seh will, aber min Wunsch, ins Outback z'go, und no chli umme z'reise wird immer groesser!! Ich hoff so, dass ich no oepper find, wo au umme reise tuet, oder das es suescht e Loesig git!! Ich han do in Airlie Beach paar jungi Fraue troffe, wo eleige reise und sehr gueti Erfahrige demit gmacht haen, mol luege, oeb das was fuer mi waer...

Ich hoff es goht euch guet!!

Gruess us em heisse Australie!!

 

2 Kommentare 15.1.07 05:59, kommentieren

Rege, Rege, Rege...

Hallo zaemme!!

Isch mol wieder an der Zyt, euch was z'brichte! Ich han viel erlebt in der letschte Wuche!

D'Schuel ishc immer no ok!! Ich ha langsam mehr Kollege und es isch luschtig mit ne. Am Donnschtig haemmer es Abschiedsbarbeque ka. Es isch ganz nett gsi, aber leider haen uns grad au Luet verlo, wo mir doch sehr ans Herz gwachse sin und mi au amigs ufbaut haen und mi eifach zum lache brocht haen! Ich hoff ich cha mit dene in Kontakt bliebe und wer weiss, viellicht gang ich mol uf Brasilie oder Thailand go die Luet bsueche.

Am Frittig haemmer unseri Friday Excursion ka. Doert mache mir immer was speziells. Mir sin go Tennis spiele. Es isch mega heiss gsi uf em Platz, aber mir haen Spass ka!! Ich kapier d'Regle leider immer nonig (Noemi, viellicht chasch mir das mol no chli noecher bringe?). Ich han aber zum Glueck en mega geduldige Partner ka (mir haen in zweier Grueppli gspielt) und er isch wuerklich guet gsi und so haen mri uns super ergaenzt!

Am Samschtig bin ich mit einere us Brasilie go Kayak fahre. Eigentlich haemmer jo welle en ganze Dag go, aber wegem Wetter haemmer nur en halbe Dag choenne go. Ich bi zerscht chli enttuescht gsi, aber im nochhinein mega froh! Mir haens nit so im Griff ka, dass heisst, mir sin langsam gsi und haen am Schluss en separate Guide brucht, wil mir so Problem ka haen. Ich weiss nit, oebs am Kayak glege het, oder an uns... Mir haen denn ufere kleine Insel pause gmacht und doert haemmer choenne schnorchle und haen Lunch gaesse. S'Schnorchle isch ok gsi, es het eifach guet do, mol wieder im Meer z'schwimme, aber gseh haemmer nuet. Uf em Heimweg hets denn au no agfange regne und es het au chli Welle ka, was das ganze zunere wacklige Aglegeheit gmacht het. Schildkroete haemmer leider au nit gseh... Im Grosse und Ganze isch es ok gsi, ich denk aber nit, dass ich es nomol mach.

Am Dag druff bi ich mitere Japanerin go Ocean Rafting mache. Ich sag euch, dass ich so cool!! Das isch so mega genial gsi. S'Wetter isch zwar voll grusig gsi am Morge und mir haette fascht abgseit, aber wil sie d'Tour abote haen, haemmer denkt goemmer halt doch!! Und es het sich glohnt. Es isch zwar sehr Wolkeverhange gsi, aber es het nit gregnet ka!! Mir haen so viel Spass ka. Bi der Whitsunday Island haemmer en kleine Bushwalk zumene Lookout gmacht. Uf em Weg doert ane hets so intensiv nach Eukalyptus gschmoeckt, mega cool, wie es Halstaefeli :-) Bim Lookout simmer chli ueber d'Ussicht informiert worde. Me seht ueber de ganzi Whitehaven Beach. Wil aber Fluet gsi isch, isch es nit ganz so schoen gsi, wie uf de Foetteli vo de Poschtkarte, wo bi Ebbe gmacht worde sin. Uf em Rueckweg zum Boot haemmer zwei Eidechse gseh, die sin mega gross gsi und mega schoen!! Denn isch es wieter zum Whitehaven Beach gange, wo mir Lunch ka haen. Mmmmh, isch de guet gsi!! Und denn uf em Heimweg simmer no zu zwei guete Schnorchelplaetz. D'sunne het denn no richtig gschunne ka und me het richtig wiet gseh unter Wasser. Unsere super Guide het uns alles ueber d'Koralle und d'Fisch verzellt. Mir haen d'Fisch gfuetteret ka und durch das haemmer au vieli us ihrne Versteck glockt. Es sin so schoeni Fisch gsi, so bunt und alli Groessene. Es isch au e Maori Wrasse ko, de isch fascht so gross wie ich. Das isch de hammer, wenn de Aug in Aug mit dem riese Fisch bisch und en au alenge kasch. Wow!! Bim zweite Ort het denn s'Wetter wieder zue gmacht, aber mir haen glich Spass ka! Grad wommer denn us em Wasser sin, hets richtig afange aber regne. Um uns umme sin Insle gsi, vom eint Moment uf de ander het me nuet me gseh, es sin nur no mir uf em Meer gsi und die dicke Wolke mti em heftige Rege!! Es mega Erlebniss!! Ich ha mi glaubs no nie so sehr ab em Rege gfreut, wie do in Airlie Beach und uf em Meer!!! Denn simmer mit unserem schnelle Boot wieder heime und nomol haen unseri Guide uns ueber d'Insle ufklaert und mir haens mega glatt ka!! Das isch definitiv de beschti Dag gsi, wo ich do in Airlie Beach ka han!! Ich wird gli wieder go Ocean Rafting mache, es isch so toll, und do sie zwei Toure abiete, wird das sicher lohnenswert si!!

Sit letschter Wuche haemmer recht heftige Rege, das isch so cool!! Es isch amigs mega lut und d'Strosse sin chli ueberfluetet und me hoert d'Froesch. D'Wetseason het also agfange, was au heisst, mir muen uns uf d'Zyklone vorbereite. Ich faend das no sehr ufregend... Mol luege, oeb sich paar bilde und zu uns koemme...

Geschter ha ich min Geburtsdag gfyyrt. Ich han chli Angscht ka vo dem Dag, wil ich ha denkt ich bi eleige und so, aber es isch super gsi!! Ich han sogar Gschenkli beko und was fuer tolli!! Es Dankschoen au an alli, wo mir gschriebe haen und an mi denkt haen!! Bi chli stuermischem Wetter ha ich an de Lagune wohl mini groeschti Geburtsdagsfyyr ka. Eifach wil alli Schueler debi gsi sin. Es ishc mega laessig gsi, s'Happy Birthday in viele verschiedene Sproche gsunge z'beko. Die wo mi kenne, wuesse jo, dass ich das nit so mag, aber ich han Freud ka. Han denn au no e kleini Red muesse halte, haen zum Glueck nit viel mitbeko...  S'Barbeque (BBQ) isch fein gsi. Unser Oesterricher het super grilliert. So ha ich ganz viel feini Sache z'aesse ka. De Sho Go, unsere 16-joehrig Japaner, het mir en Teller mit diverse Fruecht brocht ka. Denn hets grossi Diskussione geh, wie jetzt wohl jedi Frucht heisst und wie sie in dr jewilige Sproch heisst. Es isch mega fein gsi!! Und denn nach em Esse hets afange regne. Denn simmer ins Magnums (Pub). Doert han ich denn mini 20 Kerzli uf mi Kueche gsteckt und sie au alli ufs mol choenne usblose :-) Es isch en super Dag und Obe gsi. Ich haetts mir fascht nit schoener choenne vorstelle!! Wenn ihr alli no debi gsi waered, waers aber -no besser gsi!! 

Mini Plaen fuers no chli Umereise werde immer konkreter. Es isch guet Moeglich, dass ich no chli verlaengere und das schoene Land no bitz gnauer alueg!!

So, das isch es fuer die Wuche... Danke vielmols nomol fuer euri Mails und Sms fuer mi B-Day. Und danke vielmols au fuer d'Kommentaer und Gaeschtebuechitraeg vo euch!!

 

1 Kommentar 23.1.07 06:37, kommentieren

Durch den Monsun...

Hi there!

Isch wieder mol Zyt, chli was z'brichte. Mini Wuche isch ganz ok gsi, s'lauft immer chli was und trotzdem langwiel ich mi amigs no. S'Wetter isch sogar uebers Wucheend besser worde und ich han natuerlich grad wieder en Sunnebrand igfange!! Es isch eifach so extrem, wie me ufpasse muess, dass me gnueg Sunneschutz het. Vermuetlich liets aber au an de Creme, wil wenn ich keini han, han ich kei Sunnebrand. Sit em Zischtig regnets wieder. Es isch richtig monsunartig mit Wind. Das heisst me goht use mit em Schirm, aber de Wind machts fascht unmoeglich, dass me trocke bliebt. Und es schuettet richtig abe sit ca. 24 Stunde jetzt. Es fasziniert mi no sehr! Mini Lehrerin het gmeint zwei Zyklon irgendwo uf em Pazifik waere Grund fuer das Wetter. Und mi Host-Dad het gmeint, de Rege choennt zwei Wuche no adure!! Super!! ICh bruch guets Wetter zum go schnorchle und ufs Meer usechoenne. Das Wucheend wird ich aber uf em Feschtland bliebe, ich woett e Krokodil-Safari mache. Hoff es wird was...

Ich woett euch nit mit em Wetter und so langwiele, drum verzell ich euch, was ich so erlebt han letscht Wuche. Am Frittig isch "Australia Day" gsi. Ich han mich sehr uf de Dag gfreut, usserdem isch es de erscht sunnigi Dag sit langem gsi (De Wetterfrosch isch wohl Australier?). Es het gheisse es het live Musik und Breakfast BBQ und Lunch an de Lagoon. Wo ich doert mit mine Mitschueler ako bi (mir haen kei Schuel ka denn) isch aber niemerts doert gsi, mir sin praktisch die einzige an de Lagoon gsi. Komisch, isch alles scho umme? Mir haen uns nuet debi daenkt, haen chli gschwumme und relaxt, es isch u heiss und humid gsi!!! Spoeter haemmer denn mtibeko, wie oepper gseit het, dass s'Fescht an e andere Platz verschobe worde isch, wil s'Wetter so unsicher gsi isch. Super!! Naja, isch egal, mir haens trotzdem laessig ka und an dr Lagoon hets vieli Luet ka, mit de australische Flagge und mit em Southern Cross ufgmolt, etc. S'isch laessig gsi!! Am Nomidag simmer denn zunere Mitschuelerin heime. Doert het ihri Familie Luet iglade und es het ganz viel Persone ka. S'isch laessig gsi, wil es so viel Australier ka het und trotzdem so international gsi isch, wege uns Studente. Au im Garte het's ueberall Australie-Flagge ka und de Dresscode isch "green-yellow" gsi. Mir haen es riese BBQ ka und spoeter haemmer denn no Cricket gspielt. Ich han aber nur zuegluegt :-) Ich ha no recht lang mti de Australier doert gredet, han aber muesse feststelle, dass jede vo ihne urspruenglich us Europa chunnt. Also d'Eltere sin mit de Kinder igwanderet, wo sie no chlei gsi sin, oder bevor sie gebore worde sin.

Am Samschtig haemmer e grossi Party bimene Mitschueler us de Schwiez deheime ka, er het Sturmfrei ka. Es isch mega laessig gsi!! Bi ihm deheime het's en Pool, e Ping-Pong-Tisch und en Billardtisch. Mir haen natuerlich au es BBQ ka und es isch viel trunke worde (nit vo mir, ich bi chrank gsi und ha Medis gschluckt). Es het so guet do, eifach mol nit an de Lagoon z'si und wo anders abhaenge z'choenne, usserdem het me e mega schoeni Sicht ufs Meer ka!

Am Sunntig bin ich in d'Kirche und denn am Nomidag bini mit paar neue Fruende vo de Church zu de Cedar Creek Falls. Das isch so en kleine Wasserfall und e kleins Seeli. Isch schwer zum erklaere. Es isch mega agnehm gsi, im Wasser z'schwimme. Es isch nit sehr kalt und nit allzu warm gsi, also genau richtig. Aber ich denk gwuessi Australier wuerde behaupte es isch A****-kalt gsi :-) Die haen sich agstellt, das glaubed ihr nit... Wegem Rege wo mir die vorige Daeg immer ka haen, het's denn au en Wasserfall ka. S'isch so relaxing gsi!! Irgendwie haen d'Australier denn usegfunde, das min B-Day gsi isch, so haen sie gfunde, muess gfyyrt werde. Zobe simmer imene Restaurant go esse und ich han nomol Gschenkli und Blueme beko, richtig verwoehnt haen sie mi. E Kellnerin het denn no e Kueche brocht und afange singe und die isch denn richtig abgange mit "Hipp Hipp Hurray", etc. isch so cool gsi :-)

Am Wucheend isch no mini Host-Sister uszoge. Ich bi sehr froh drueber, wil sie het Problem mit mine Host-Eltere ka und es isch eifach immer so e agspannti Atmosphaere gsi. Jetzt isch es wieder voll easy und locker. Ich bi also au do wieder es Einzelkind und saufroh drueber. :-)

Geschter bini mit mine Mitschueler in Sailing Club go esse. S'Esse isch ganz ok, de zahlsch 15.- und kasch de Teller voll biege mit allem wo de kasch kriege und es Dessert gits au no. Denoch simer denn no in e Club, ins Beaches. Bin s'erschtmol doert gsi. S'isch sau cool, Oldies sin gloffe und d'Stimmig isch super gsi!

Ich moecht mi entschuldige fuer mini Grammatik. Ich han langsam richtig mueh mit englisch + duetsch. Also mit englisch hani weniger Problem, aber duetsch isch Katastrophe. In dr Schwiez muess ich glaubs zerscht en Duetschkurs bsueche :-P

Wer gern mol chli mit mir per MSN quatsche woett, soell sich bitte per Kontaktformular bi mir melde, denn cha me was abmache. Und wer mini aussie Natelnummere woett, soell sich doch au bitte so melde.

Zum Schluss no was: Ich merk immer meh, isch lern KEI englisch do sondern australisch. Das git euch jetzt die einmaligi Chance do durch mi au paar Woertli z'lerne. D'Australier benutze au viel Abkuerzige, alles wird abkuerzt. Also, Lektion 1: BBQ, dass isch mi Beschaeftigung Nummer 1 bi schoenem Wetter, etc. kei Party ohni BBQ. Aber was heisst BBQ? Es BBQ isch usgschriebe: Barbecue und beduetet Grillarty, aber me bezeichnet demit au de Grill, uf dem me s'Fleisch und s'Esse grillt. So, lerned das brav, ich mach denn es grosses BBQ im Summer, wenn ich zrugg bin... :-P Bim noeggschte Blogitrag wird ich euch oeppis Neus lerne... :-)

Ich wuensch euch e gueti Zyt. Ich freu mi ueber jede Kommenater und ueber jedes Lebenszeiche vo euch, also loend was hoere!! :-)

See you, Sarah

1 Kommentar 31.1.07 23:32, kommentieren