Archiv

Letschti Wuche in Basel!

 

Mini letschti Wuche isch abroche. Deheime herrscht ei Chaos. Ich ruum uf und ruum uf, aber es wird immer wieder s'gliche Chaos. Naja, egal... Es lauft no mega viel die Wuche und nebebi muess ich no Sache bsorge, luege, öb ich alles han, was ich bruch, mir Gedanke mache, was alles in Koffer muess, welle Koffer ich nimm,... Ihr sehnt, ich bi also no richtig beschäftiged. Allerdings bini no voll ruhig, wil ich checks eifach nonig ganz, was abgoht und mach eifach nur.

Am Samschtig isch no de letschti Brief vo de Reiseorganisation cho. Dört isch ebbe au die langersehnti Adresse und Beschriebig vo de Gaschtfamilie dinne gsi. Es isch e Frau (singlemother ?), Tina, und ihre 10-jährige Sohn Jade. Sie hän e Hund (hoff en kleine, liebe) und e Vogel. Es het Internet (jippieeee), Fernseh und im Garte e Schwimmbad. Es het im gsamte vier Schlofzimmer in dem Huus, sehr wahrschienlich bi ich nit die einzigi Studentin dört.

Ich han am Wucheend nomol mit mim Götti und miner Tante telefoniert und freu mi jetzt eifach unheimlich druff, endlig wieder mit ihne persönlich z'rede und nüm über e Telefon, ich find das mega unagnehm und d'Verbindig isch amigs so schlecht. Wenn ich so us em Fenschter lueg und das gruusige, kalte Wetter seh, freu ich mi eifach uf Sunne und die ca. 30 °C und ufs Meer. Ich chönnt no vieli anderi Sache ufzähle, aber ich los das jetzt mol!! ;-)

Es cha si, dass das jetzt scho mini letschti Mitteilig us de Schwiez gsi isch. Ich freu mi über jede, wo mir mol is Gäschtebuech schriebt, oder süscht irgend e Kommentar git. Und natürlich au über eMails. Ich gib mir Müeh, zum euch uf em Laufende z'bhalte, chan aber nüt verspreche.

 

 

1 Kommentar 5.12.06 11:08, kommentieren

Ich has gschafft!!!!

Hallo mini Liebe!

Ich han e agnehmi Reis ka und bi guet ako. Haett kei Minute laenger in dem Flugi choenne hocke, mir het alles weh gmacht. Dummerwies hani de "Flugzuegfrass" nit vertreit, jetzt isch mir immer no uebel. Hoff ich erhol mi gli.

Es isch sehr warm do in Australie, muess mi no chli dra gwoehne...

Machets guet und vergessed mi nit!!!

2 Kommentare 12.12.06 23:07, kommentieren

Neui Gastfamilie...

Es isch passiert, was ich nit han welle: Ich han e neui Gastfamilie zueteilt beko. Die erschti Familie cha mi us private Gruend nit neh :-( Jetzt han ich e anderi Familie beko, es isch es Ehepaar miteme Vogel als Huustier. S'Huus segi neuer und het en Garte. Ich han Internetaschluss doert und en eigene TV. Die Familie isch noecher an de Schuel. Bin gspannt, wie die Familie so isch, wird gli Kontakt ufneh,

Leider ha ich Problem mit mim Mail. Ich chan Mails beko und lese, aber ich cha d'Mails nit beantworte oder loesche (han mega viel Spam beko...). Geduldet euch bitte eifach!!

Machets guet!

2 Kommentare 13.12.06 21:58, kommentieren

Halli Hallo!

Mir goht's wieder besser, dass heisst, ich chan wieder esse und bhalts au. Soett also gli wieder fit si.

Mini Mails hani au im Griff :-)

E schoeni Wuche

Sarah

2 Kommentare 17.12.06 23:09, kommentieren

Erschti Wuche in Down Under

Hallo mini Liebe!!

Jetzt bin ich scho e Wuche do!! Ich bi so happy, dass ich wieder fit bin und endlig au Sache chan mache und au chli ummechum!! Huet haemmer chli en easy Dag, drum nimm ich mir jetzt au Zyt zum mol chli meh schriebe... Huet bini eifach chli mit de Lauren (mini Tante) go paar Sache erledige und chli go Shoppe. Also meh luege, wie shoppe. Es het soooooo tolli Kleider und Sache, das glaubed ihr gar nit!!! Ich freu mi scho uf de Donnschtig, wil denn fahre mir uf Brisbane zum Shoppe. Ich hoff ich find doert es astaendigs Bikini und e tolli Taesche, dass sin die wichtigschte Sache, wo ich jetzt bruch... Endi Wuche goht's chli noerdlich uf Coolum an d'Sunshine Coast, denn bruch ich es Bikini!!

Am Sunntig isch de erscht Dag gsi, wo ich mol wieder chli han choenne esse, zum Glueck, wil Zobe simmer an d'Australian Outback Spectacular Show gange. Doert wird so chli s'Lebe im Outback zeigt. Es het Roesser und anderi Tierli, und es wird gsunge und Theater gspielt. Und de Zueschauer chan debi esse, mega fein (naja, ich han gfaschtet...) Jede Zueschauer het no so e Huet beko, me isch also au mit em Outfit voll involviert gsi :-)

Am Mentig haen d'Lauren, ihri Muetter (Jenny) und ich Guetzli backe. S'ganze Huus het meh nachere Fabrik usgseh. Ich han no nie soooo viel Guetzli an einem Daag gmacht. Es sin au alles anderi Guetzli als ich kenn, ich wird also viel z'probiere ha :-) Kas mir jo leischte, muess wieder zueneh... :-)

Ich freu mi scho uf morn. Denn gangi mit de Jenny und de Tochter vo de Schwoeschter vo miner Tante, de Natasha, ins SeaWorld. Ich lieb so Dinger mega, chas chum erwarte!! Ich cha denn endlig chli Foetteli mache. Leider cha ich euch keini praesentiere, wil ich Hirsch das Verbindigskabel vor Kamera zum PC deheim vergesse... Mir wird aber denn scho no was ifalle, notfalls mues sich es neus kaufe.

Ich denk das ich de letschti Itrag gsi vorerscht. Muess mol luege, oebs die Wuche no was z'brichte git und ich Zyt han. Und ebbe, am Samschtig goht's an d'Sunshine Coast, denn hani kei Internet meh. Und vo de Sunshine Coast goht's denn direkt uf de Airport z'Brisbane, wo ich denn ins Flugi uf Airlie Beach gang, bzw. zu de Gaschtfamilie. Bin voll nervoes, probier dene huet Zobe z'aluete, bin jo sooo gspannt!!

Ich glaubs eifach nit, dass am Sunntig Wiehnachte isch. Bin so nonig in Stimmig, au wenn do alles uf Wiehnachte usgrichtet isch. Ueberall haen d'Luet Shirts a, wo HoHoHo oder was mit Merry Christmas druff stoht und paar Hueser haen voll uebertriebeni Beluechtig und Dekoration (unser Huus zum Glueck nit).

Also mini Liebe, ich wuensch euch a very Merry Christmas and a Happy New Year!!!

Find das super, wie ihr fliessig ins Gaeschtebuech schriebet und Kommentaer schriebet!! Freu mi ueber alles wo ich vo euch z'lese krieg!!!

Machets guet, hebet sorg!!

euri Sarah

P.S.: Wer d'Adresse vo miner Gaschtfamilie moecht ha, soell mir doch bitte e SMS oder e Mail schriebe. Danke!!

 

19.12.06 06:59, kommentieren

Merry Christmas

Ich wuensch euch allne e froehlichi Wiehnachte und en guete Rutsch ins 2007!!

Meld mi im neue Johr wieder uf dem Blog, hoff ich krieg denn au mini Foetteli uf e anderi Page.

Die wo sich bi mir gmolde haen wege de Adresse, muen sich no chli gedulde, es isch nonig sicher, dass die Gaschtfamilie wo ich jetzt ha, mini Gaschtfamilie bliebt.

 

3 Kommentare 21.12.06 23:20, kommentieren