More News

So, d'Schuel isch umme fuer Huet. Ich nimm mir chli Zyt, zum euch chli meh z'brichte...

Letscht Wuche isch am Beach es Chai Tent gsi. Jugendlichi vo de ganze Welt haen gratis Tee serviert, live Musik gspielt und me het mit ihne rede und spieli mache choenne. Das ganze het mir aber vorallem so guet gfalle, wil die Jugendliche vo "Jugend mit einer Mission" gsi sind. Ich han also die erschte Chrischte doerfe treffe. Ich bi sehr froh drum gsi, wil ich mi so einsam gfuehlt han und in dem Chai Tent ha ich mi grad wie deheim gfuehlt. D'Atmosphaere isch so speziell gsi, eifach schoen. Leider sin die Jugendliche wieder zrugg uf Brisbane... Durch das Chai Tent ha ich usegfunde, wer suescht no Chrischt isch, es sin einigi... :-) Mit einige bini geschter Zobe in d'Kirche gange. Es isch kei Gottesdienscht gsi, aber so e Art Kaffi und oepper het ueber Kambodscha verzellt, er isch doert gsi go Brugge baue in de Slums. D'Luet sin sehr fruendlich gsi in dr Kirche, ich wird uf jedefall wieder go, allerdings am Morge. Ich bi so froh anderi Chrischte troffe z'ha, ich vermiss es so mit andere ueber "Gott und die Welt" z'rede und z'worshippe mit andere zaemme.

Ich bi immer no sehr happy mit miner Gaschtfamilie. Ich verstoh d'Mavic mis Host-Mami immer besser. Sie isch vo de Philippine und am Afang han ich wuerklich fascht kei Wort verstande, wo sie gseit het. Sie kocht mega guet und macht mir immer en mega Lunch parat. Die andere vo de Schuel sin ganz niedisch :-P Muend also kei Angscht ha, dass ich verhungere... s'nimmt mi no mega Wunder, oeb ich scho zuegno han, wil do in Australie han ich immer recht spot z'Nacht gesse und mega viel gaesse...

Paar vo euch wuesse jo, dass ich mi nit so wohl fuehl do. Es isch eifach immer es uf und ab. Ich cha nit saege, wie es mir grad goht, ich weiss es selber nit. Ich bruch eifach no Zyt. Haett nie denkt, dass es so schwer isch...

S'Doerfli isch ganz ok, halt touristisch und mega viel Reisebuero het's, aber au gueti Chleiderlaede. Ich mag de Style do mega, er isch viel lockerer als in de Schwiez.

Leider cha me nach de Schuel gar nit viel mache, usser in es Pub go suffe (was paar Mitschueler mache), oder an d'Lagune go. Das isch so e Art Schwimmbad, aber gratis und es het au chli Sand als Beach. Aber s'Wasser het e recht gruusige Gschmack (Chlor und Salz und no Sache wo ich nit wuesse will!!) Aber nach em zweite Schwumm doert drin het's mir scho besser gfalle. Ok, ich bi am Morge go ritte und de ganz Dag in lange Hose ummegloffe, ich ha es richtig gnosse im Wasser. Ins Meer chame do ebbe nit go bade. Es isch viel z'gfoehrlich wege de Stinger und andere Qualle, wo toedlich sin!

E anderi Studentin het mir gseit, d'Schuel wuerd uf Afang Februar zuegle. Ich han kei Ahnig, oeb das es Gruecht isch... Uf de Foetteli het d'Schuel recht neu usgseh, aber sie isch es nit. D'Bibliothek isch gschlosse, die gits nuem. D'Cafeteria isch au no nie offe gsi, sit ich do bi... Bin gspannt, oeb mir wuerklich zuegle. S'Andere Gebauede isch noecher bi mir deheime und schoen gross...

Jo, ich denk das laengt mol sowiet, viel mehr gits nit z'verzelle...

Machets guet, ich denk viel an euch...

Sarah

 

8.1.07 05:30, kommentieren

News

Hallo mini Liebe!!

Wie es euch wohl goht? Mir goht's mehr oder weniger guet. Es isch halt alles wieder neu fuer mi und ich muess mi no ilebe, bruch no Zyt.

Vom 23.12. bis 01.01. bin ich mit mine Verwandte an de Sunshine Coast in Coolum gsi. Doert haemmer Wiehnachte gfiert. Es isch sehr schoen gsi, au wenn ich gar nit in Wiehnachtsstimmig gsi bi. Unsere Baum isch sehr kitschig gsi. Ich han no nie so viel Gschenkli unter emene Baum gseh, und mir haen dreimol Gschenkli drunter do, wil mir mehrmols gfiert haen (mit andere Luet). Jedes Familiemitglied het es Shirt aka, miteme Wiehnachtsslogan druff (HOHOHO...), und mir Fraue haen zuesaetzlich no so Rentierhoerner mit Gloeckli oder Laempli dra aka. Es isch mega luschtig gsi!! Nach dem mir denn am Mentigmorge Geschenkli uspackt haen, simmer an Strand gange. D'Welle sin mega gross und kraeftig gsi, aber mti de Zyt hani mini Angscht verlore. Mi Goetti und ich mir haend es Boogieboard debi ka, das isch so es churzes Brett, aehnlich wie e Surfboard, nur dass me druf liet. Das het mir grosse Spass gmacht und je groesser d'Welle, desto schneller isch me mit dem Brett. Fuer mi isch denn klar gsi, ich woett unbedingt surfe lerne. Am noeggschte Dag haen mi Goetti, ich und no oepper anders vo de Familie e Surfstund ka! Das isch sooooo laessig gsi,d as glaubed ihr gar nit!! Und s'Wetter isch voll bewoelkt gsi, d'Welle sin no hoecher gsi als am Dag vorher und es het Qualle im Wasser ka! Es isch wuerklich nit amaechelig gsi, aber e Surfe goht halt glich ins Wasser! Ich han nach em surfe ganz roti, offeni Knie und Bei ka, wil das Brett so ruch gsi isch und am Dag druff hani mi paar Joehrli aelter gfuehlt... :-) Paar Daeg spoeter haen mi Goetti und ich es Brett gmietet, aber die haen uns z'Kleini Bretter geh, so das mir abgsoffe sin, wenn mir probiert haen ufzstoh und wil die nuemi bi de Huette gsi sin, haemmer nit wechsle choenne. Das isch sehr schad gsi. Aber au allgemein sin d'Bedingige zum Surfe nit so guet gsi, wie am andere Dag. Ich han an de Sunshine Coast au choenne go Fliege. De Vater vo miner Tante isch Pilot und denn haemmer so es chleins Flugzueg (Cessna?) choenne miete und go fliege. Dasisch was vom schoenschte gsi, wo ich je gmacht han. Ich han mi so in die Sache verliebt, wo ich gseh han waehrend em Fliege. Mir sin vom Flugplatz zu unserem Appartment gfloge und denn de lange Kueschte entlang uf Noosa. S'Wasser isch so schoen hellblau gsi und so klar. Mir haen Delfin gseh und ich han no e Roche gseh und suescht het's no grossi Fisch ka, wo mir nit haen choenne definiere. Han ganz vieli Bildli gmacht! Und s'tolle isch gsi, wo ich uf Airlie Beach greist bin, bin ich wieder ueber d'Sunshien Coast gfloge, nur halt hoecher, aber ich han alles nomol richtig in mi ine suuge choenne :-) Mir sin au mol go Rockpools aluege, also due Tuempeli wos zwuesche de Felse git, wenn Ebbe isch. Doert haemmer ganz vieli Krabbe gseh, die sin so blau und bruun gsi, han no nie soenigi mit so Farbe gseh! Uns isch denn aber d'Freud vergange, wo mir fascht vomene Stei troffe worde sin, wo irgend so en Depp wohl gworfe het... So, ihr froget euch sicher: Wie isch wohl de Sarah ihre Silveschter gsi?? Tja, ich muess euch enttuesche, ich chan nit viel brichte, hans naemlig verschlofe... De Nigel (Vater vo miner Tante), mi Goetti und ich mir sin am Morge vom 31.12. am drei ufgstande und sin mitem Boot usegfahre zum go fische. Das isch sehr schoen gsi, aber au astrengend. Mir haen ganz viel Fisch gfange (die haen wohl hunger ka...), aber wil sie z'klei gsi sin haemmer alli usser eine wieder muesse zrugg werfe! Die Fisch sin soooo schoen gsi, so richtig bunt oder mit viel Zacke. Mir haen au Schildkroete gseh und no so richtig grossi Qualle mit Tentakle. Und paarmol isch e Schwarm mit riesige Fisch an unserem Boot verbi gschwumme, mega schoen!! Mir haen denn am Nomidag chli gschlofe, aber schienbar nit gnueg, ich jedefalls nit! Zobe haemmer am Beach no Fish und Chips gaesse, haens Fuerwerk agluegt wo am achti gsi isch, haen chli was trunke und Scharade gspielt (Pantomime...). Am zehni simmer zrugg ins Appartment, ich bi anegsesse und sofort weggsi... Am Morge vom 01.01. haen mi mini Tante und mi Goetti uf Brisbane zum Flughafe brocht und ich bi denn uf Proserpine gfloge. De Airport isch so chlei, das gits gar nit! Links und rechts vo de Pischte hets Wald und unser Flugi isch s'einzige gsi. Es anders haett gar niene Platz ka. Das isch vo Vorteil gsi, ich han grad s'Schildli mit mim Name druff gseh und so min Host-Dad troffe. Zaemme simmer denn nach Cannonvale, mim jetzige deheim gfahre. Uf em Weg hani ganz vieli toti Kaenguruhs uf de Stross gseh. :-( S'Huus isch mega neu aber klei. Mi erschte Idruck vom Zimmer: Schuehschachtel... jetzt isch es chli besser!! Aber so japanisch, wil die vor mir isch Japanerin gsi und die chuntn in paar Moenet wieder... Sie haen en Papagei, wo miner meini mega schoen isch, aber voll luut!! De Fernseh lauft immer und er trinkt mega viel Bier. Aber mini Host-Eltere sin mega nett und das machts mir chli eifacher, mich izgwoehne. D'Schuel isch mega klei, isch ganz anders in Wuerklichkeit als uf de Bilder. Die andere Studente sin ok. Ich bin eini vo de juengschte und die einzig wo s'First Certificate of English macht! Jetzt fangt denn d'Schuel a, bricht spoeter mehr!! Haend jo glaubs gnueg z'lese fuer de Moment!! ;-)

Machets guet, hebet sorg!!

Sarah

 

1 Kommentar 4.1.07 23:29, kommentieren

Merry Christmas

Ich wuensch euch allne e froehlichi Wiehnachte und en guete Rutsch ins 2007!!

Meld mi im neue Johr wieder uf dem Blog, hoff ich krieg denn au mini Foetteli uf e anderi Page.

Die wo sich bi mir gmolde haen wege de Adresse, muen sich no chli gedulde, es isch nonig sicher, dass die Gaschtfamilie wo ich jetzt ha, mini Gaschtfamilie bliebt.

 

3 Kommentare 21.12.06 23:20, kommentieren

Erschti Wuche in Down Under

Hallo mini Liebe!!

Jetzt bin ich scho e Wuche do!! Ich bi so happy, dass ich wieder fit bin und endlig au Sache chan mache und au chli ummechum!! Huet haemmer chli en easy Dag, drum nimm ich mir jetzt au Zyt zum mol chli meh schriebe... Huet bini eifach chli mit de Lauren (mini Tante) go paar Sache erledige und chli go Shoppe. Also meh luege, wie shoppe. Es het soooooo tolli Kleider und Sache, das glaubed ihr gar nit!!! Ich freu mi scho uf de Donnschtig, wil denn fahre mir uf Brisbane zum Shoppe. Ich hoff ich find doert es astaendigs Bikini und e tolli Taesche, dass sin die wichtigschte Sache, wo ich jetzt bruch... Endi Wuche goht's chli noerdlich uf Coolum an d'Sunshine Coast, denn bruch ich es Bikini!!

Am Sunntig isch de erscht Dag gsi, wo ich mol wieder chli han choenne esse, zum Glueck, wil Zobe simmer an d'Australian Outback Spectacular Show gange. Doert wird so chli s'Lebe im Outback zeigt. Es het Roesser und anderi Tierli, und es wird gsunge und Theater gspielt. Und de Zueschauer chan debi esse, mega fein (naja, ich han gfaschtet...) Jede Zueschauer het no so e Huet beko, me isch also au mit em Outfit voll involviert gsi :-)

Am Mentig haen d'Lauren, ihri Muetter (Jenny) und ich Guetzli backe. S'ganze Huus het meh nachere Fabrik usgseh. Ich han no nie soooo viel Guetzli an einem Daag gmacht. Es sin au alles anderi Guetzli als ich kenn, ich wird also viel z'probiere ha :-) Kas mir jo leischte, muess wieder zueneh... :-)

Ich freu mi scho uf morn. Denn gangi mit de Jenny und de Tochter vo de Schwoeschter vo miner Tante, de Natasha, ins SeaWorld. Ich lieb so Dinger mega, chas chum erwarte!! Ich cha denn endlig chli Foetteli mache. Leider cha ich euch keini praesentiere, wil ich Hirsch das Verbindigskabel vor Kamera zum PC deheim vergesse... Mir wird aber denn scho no was ifalle, notfalls mues sich es neus kaufe.

Ich denk das ich de letschti Itrag gsi vorerscht. Muess mol luege, oebs die Wuche no was z'brichte git und ich Zyt han. Und ebbe, am Samschtig goht's an d'Sunshine Coast, denn hani kei Internet meh. Und vo de Sunshine Coast goht's denn direkt uf de Airport z'Brisbane, wo ich denn ins Flugi uf Airlie Beach gang, bzw. zu de Gaschtfamilie. Bin voll nervoes, probier dene huet Zobe z'aluete, bin jo sooo gspannt!!

Ich glaubs eifach nit, dass am Sunntig Wiehnachte isch. Bin so nonig in Stimmig, au wenn do alles uf Wiehnachte usgrichtet isch. Ueberall haen d'Luet Shirts a, wo HoHoHo oder was mit Merry Christmas druff stoht und paar Hueser haen voll uebertriebeni Beluechtig und Dekoration (unser Huus zum Glueck nit).

Also mini Liebe, ich wuensch euch a very Merry Christmas and a Happy New Year!!!

Find das super, wie ihr fliessig ins Gaeschtebuech schriebet und Kommentaer schriebet!! Freu mi ueber alles wo ich vo euch z'lese krieg!!!

Machets guet, hebet sorg!!

euri Sarah

P.S.: Wer d'Adresse vo miner Gaschtfamilie moecht ha, soell mir doch bitte e SMS oder e Mail schriebe. Danke!!

 

19.12.06 06:59, kommentieren

Halli Hallo!

Mir goht's wieder besser, dass heisst, ich chan wieder esse und bhalts au. Soett also gli wieder fit si.

Mini Mails hani au im Griff :-)

E schoeni Wuche

Sarah

2 Kommentare 17.12.06 23:09, kommentieren

Neui Gastfamilie...

Es isch passiert, was ich nit han welle: Ich han e neui Gastfamilie zueteilt beko. Die erschti Familie cha mi us private Gruend nit neh :-( Jetzt han ich e anderi Familie beko, es isch es Ehepaar miteme Vogel als Huustier. S'Huus segi neuer und het en Garte. Ich han Internetaschluss doert und en eigene TV. Die Familie isch noecher an de Schuel. Bin gspannt, wie die Familie so isch, wird gli Kontakt ufneh,

Leider ha ich Problem mit mim Mail. Ich chan Mails beko und lese, aber ich cha d'Mails nit beantworte oder loesche (han mega viel Spam beko...). Geduldet euch bitte eifach!!

Machets guet!

2 Kommentare 13.12.06 21:58, kommentieren

Ich has gschafft!!!!

Hallo mini Liebe!

Ich han e agnehmi Reis ka und bi guet ako. Haett kei Minute laenger in dem Flugi choenne hocke, mir het alles weh gmacht. Dummerwies hani de "Flugzuegfrass" nit vertreit, jetzt isch mir immer no uebel. Hoff ich erhol mi gli.

Es isch sehr warm do in Australie, muess mi no chli dra gwoehne...

Machets guet und vergessed mi nit!!!

2 Kommentare 12.12.06 23:07, kommentieren