Wieder im schoene Wetter!

 

Hallo zaemme!!

Ich han ganz es tolls Wucheend hinter mir. Mini Tante het am Samschtig e Tochter gebore!! Mini Cousine heisst Alisha und isch eifach herzig und perfekt!!

Ich ha am Samschtig no de letschti Teil vo mine First Certificate Exame ka. Ich bi eifach froh, dass es umme isch. Es isch mega schwer gsi und ich ha mi nit wuerklich konzentriere choenne. Ich weiss nur, ich ha mega bloedsinn gschriebe und ich haetts besser mache choennte... Jetzt cha ich eifach nur warte und hoffe bis im Mai!

Mini Reis isch endlich buecht und ich bi mega froh, wenn ich am reise bi. Ich ha so viel Zyt im Reisebuero verbrocht, dass isch nit normal!! Han sozusage jetzt en neue Kolleg, naemlich de Typ wo alles fuer mi organisiert het. Mir haen amigs so lang muess uf Bestaetigunge warte muesse und ich han em waehrend dem alles ueber d'Schwiez muesse verzelle. Das het mich zum Glueck devo abglenkt, dass ich am friere gsi bi in dem Reisebuero. D'Air-Conditioning isch eifach z'uebertriebe in dene Laede. Ich bi eigentlich nur am friere wenn ich unterwegs irgendwo dinne bi. Und denn gosch wieder use und es isch en mega Schock, wil es dusse so heiss isch!! Leider bi ich jetzt au wieder verkaeltet und fuehl mi schrecklich... Hoff bi gli wieder fit, wil innere Wuche goht's uf Melbourne!!! Jippie!!! Es wird viel los si in de Stadt, wil de Grand Prix (Formel 1) denn grad doert isch. Ich bi denn vier Daeg in Melbourne und gang denn fuer 4 Daeg uf Sydney! Do freu ich mi au druff!! Denn goht's fuer vier Daeg ins Outback (no meh Hitz...) und denn miteme Bus vo Sydney de Kueschte entlang nach Brisbane. Ich blieb denn doert umme bis nach Oschtere und han denn am 18. April en Rueckflug in d'Schwiez!! Also ich wird denn am 19. in Basel ako, irgendwenn... Ich freu mi mega uf die kommende Wuche und uf d'Schwiez!! Kas kum erwarte wieder bi euch z'si und persoenlich mit euch z'rede!! Zerscht wird ich aber do no de Rescht gniesse so viel ich ka!! Ich wird in dene kommende Wuche nit viel Zyt ha zum eMails schriebe oder min Blog z'schriebe.

So, ich mach jetzt e "Smoko" zum mi chli erhole. Kei Angscht ich gang nit go rauche, ich mach e Tee-/ Kaffipause ;-)

Also, ich muess chli go liege... Machets guet und hebet Sorg!!

euri Sarah

1 Kommentar 12.3.07 08:00, kommentieren

NEEEEEEEWS.....

Hallo mini Liebe!!

Ich han sit em letschte Blogitrag so viel erlebt, das glaubed ihr gar nit... Ich weiss gar nit, wo afange mit verzelle. Viellicht eifach vom letschte Blogirtrag a.

Am letschte Frittig haemmer uns alli bim Kolleg deheime troffe. De het's jo mega laessig deheime mit Billardtisch, Ping-Pong Tisch und Pool... Mir haens luschtig ka und mega die Fotisession haemmer ka. Es isch eifach so luschtig, wenn oepper mol mitere Kamera chunnt, denn choemme alli grad zaemme und es werde Bidli gmacht. Die Person wo foettelet isch eifach chli arm, wil sie ca. 10 Kameras oder so bechunnt zum Foetteli mache :-) Denn spoeter simmer in Usgang, zerscht wie imemr ins Magnums (Pub) und denn simmer no ins Mama Africa. Doert ha ich scho immer ane welle, wil ich de Name eifach so cool find. Au wenn das nti alli so gern haen, sin glich alli mitko. Also zerscht ha ich es nit toll gfunde und han eigentlich grad wieder welle go, aber es isch denn eifach luschtig gsi, fuer de Afang mol die andere Luet bim tanze z'beobachte (so luschtig...). D'Musik isch nit so min Stil gsi (also jetzt mag ich es), aber es isch glich laessig gsi und mir sin denn alli au gli am tanze gsi. Ich bereu es wuerklich, dass ich nie fruehner ins Mama Africa bi, wil es isch wuerklich no cool. Leider isch es au mis letschte mol gsi, aber do dezue spoeter... D'Zyt isch mega schnell umme gange und mir sin alli ueberrascht gsi, wo denn scho drei am Morge gsi isch, mued haemmer denn es Taxi bstellt und sin heime gfahre worde!

Am noeggschte Dag haemmer es BBQ bimene neue Schueler deheime ka, de gluecklich het au en Pool deheime!! Es isch mega laessig gsi, aber mir sin nur es kelins Grueppli gsi, paar sin ebbe doch denn an d'Lagune gange. Es het mir aber gfalle, wil ich so au mol mit Luet zaemme gsi bin, wo ich suescht nit so viel z'tue han. Es sin hauptsaechlich Koreaner gsi und zwei Japanerinne und ich.

Am Sunntig isch au traumhafts Wetter gsi. Eigentlich hani welle go schnorchle, aber ich bi die einzigi gsi, wo buecht het, also isch es ins Wasser gfalle. Defuer bi ich in d'Kirche und has doert guet ka. De Nomidag ha ich an de Lagune verbrocht mit mine Mitschueler.

Am Mentig han ich denn endlich zur Blue Pearl Bay choenne go schnorchle, eim vo de schoenschte Schnorchel-Spots in de Region. Es isch wuerklich laessig gsi, au wenn d'Sunne nit wuerklich gschunne het. Denn womer zrug zum Boot brocht worde sin, haemmer scho ghofft, dass es Lunch git (jo, schnorchle macht hungrig!), aber leider haemmer pechka. Zerscht haemmer no Boomnetting gmacht. Das isch so es Netz gsi, wo hinde am Boot befeschtiget gsi isch und denn sitzt me mehr oder weniger im Wasser und s'Boot fahrt. Es isch wie es Spa im Meer, eifach mit kaltem Wasser (wegem Rege het sichs so kalt agfuehlt). Es isch sau luschtig gsi, aber ehrlich gseit ha ich mich mehr wie e Koeder fuer e grosse Fisch gfuehlt! Ich bi eleige uf de Trip, aber mir sin so e kleini Gruppe gsi (nur 6 Luet), dass es easy gsi isch, Kontakt z'schliesse. De Skipper isch au voll de hammer gsi. Er isch de Host-Vater vonere Kollegin vo mir gsi und es het sich usegstellt, dass er mich sehr guet kennt... :-P Ich ha denn au mol s'Boot stuere doerfe, was sehr cool gsi isch!!

Am noeggschte Dag bi ich zum Great Barrier Reef, eleige. Uf em Schiff ha ich denn gli gmerkt, dass es anderi Schwiezer und Duetschi het und so bi ich nit lang eleige gsi. S'Wetter het staendig gwechslet. Einisch hets waehrend em Schnorchle in Stroeme gschifft und denn im noeggschte Moment het d'Sunne wieder gschunne.  Bi dem Pontoon wo mir gsi sind, hets au es Galssbottom Boat ka und es Semi-Submarine. So het me au ohni nass z'werde choenne d'Koralle und Fisch seh. S'Schnorchle isch mir aber glich lieber!! Doert am Riff ha ich denn endlich mol e Anemonefisch gseh, sozusage de Brueder vom Nemo :-D und ich ha au so e Art Tintefisch gseh und alles moegliche an Fisch, wo ich an andere Ort nit gseh han!

Denn am Mittwuch bini go Segle mit einem vo de schnellschte Segelkatamarane vo de Welt! Es het so es Netz vorne zwuesche de beide Ruempf ka, wo me het choenne druff hocke und liege, das ha ich sehr gnosse, wil ich bi wuerklich sehr mued gsi. Leider isch s'Wetter wieder nit so guet gsi, aber ich wott mi nit beklage, wil es haett choennte schlimmer si! Leider ha ich de Trip nit wuerklich gniesse choenne, wil ich am Obe vorher s'Telefon becho ha, dass mini Pruefige e Wuche fruehner sin. Das het mi recht ueberrascht und gschockt, wil es het gheisse, dass ich mi nit vo allne verabschiede chan und dass ich eifach weniger Zyt han in Airlie Beach, wo ich doch langsam lieb (so lang es nit regnet)! Ich bi denn halt ebbe au nuem frueh is Bett cho, bi mit Kollege weg zum mi ablenke, han mol no packt, etc. aber eigentlich ha ich bis ich denn in Brisbane gsi bin kei bitzli meh Rueh ka, sit em Aruef, wil ich immer am ummerenne gsi bi und Sache erlediget han.

Am Donnschtig isch denn no mi Abschieds-BBQ gsi. Mir haens richtig luschtig ka und ich ha es sehr gnosse.

Am Donnschtig bi ich denn nomol in d'Schuel und au am Frittig nomol fuer es Wieli und go tschuess sege. Ich ha mir eifach grossi Sorge gmacht, wil die Trips sin alli de ganzi Dag gange und ich ha kei Zyt zum lerne ka. Aber gluecklicherwies ha ich fuer mini erschte zwei Pruefige nuet lerne choenne.

Jetzt bi ich also sit geschter (Frittig, 03.03.) wieder in Brisbane bi mine Verwandte, was mich au sehr freut, aber in Gedanke bi ich immer no in Airlie und bi mine neue Fruende!

Huet han ich also Pruefige ka!! Listening and Speaking (Lose und Rede). Es isch mehr oder weniger guet gange, also ich hoffs, wil das sin sozusage mini Staerkene. Noeggscht Wuche isch denn Writing, Reading and English in use dra. Das macht mir denn scho chli mehr Sorge, wil ich halt noeggscht Wuche nit in de Schuel bi und alles selber uebe muess. Mini Lehrerin het mi aber no mit ganz vielne Uebige und Loesige bewaffnet, vo dem her soetts ok si!!

Noeggscht Wuche bi ich also am lerne und am plane, wo ich ane go choennt go reise. Ich hoff ich cha mi mitere Japanerin treffe, wo au bi mir i de Schuel gsi isch. Alles isch halt no offe und ich weiss au nonig, wenn ich in d'Schwiez zrugg chume.

Ich vermiss mini Kollege so sehr!! Ich han eifach wuerklich e tolli Zyt i de Schuel ka und ich wuerds jederzyt wieder mache. Ich woett au euch das empfehle, wenn ihr Zyt haen, goend weg vo deheime, lernet e Sproch und gniesset d'Zyt!! Es isch so e gueti Erfahrig!!

Sodeli, jetzt no es neus Woertli fuer euch. "Bugger" oder "Bugga", das passt so ziemlich zu de Situation, wo ich erfahre han, dass ich fruehner go muess. Was es heisst, weiss ich zwar nit wuerklich, aber meh chasglaub so als "mischt" oder "sch....." uebersetze. D'Australier seges halt, wenn was nit so klappt, wie es soett, oder halt ebbe, wenn was "sch....." isch...

Machets guet und hebet Sorg!

Euri Sarah

 

3 Kommentare 3.3.07 06:30, kommentieren

Jo, i leb no!

Scho lang ha ich nuet meh vo mir hoere lo. Ich bi in letschter Zyt recht beschaeftigt gsi und sogar in de Ferie gsi. Jetzt ha ich euch aber umso mehr z'verzelle.

Vor zwei Wuche bi ich s'erscht mol in de Bandprob vom Worship Team gsi vo de Kirche wo ich gang. Es isch sehr laessig gsi und ich han vieli neui Lieder glernt. Huet zobe isch es wieder so wiet. Freu mi mega druff. S'Singe, oder Worship allgemein, isch mir scho sehr wichtig!

Ich bi au uf Krokodil-Safari gsi. Zwei Mitschueler, wo us de Schwiez sin, haen mi begleitet. Es isch sehr agnehm gsi, mol wieder mit Schwiezer was z'mache. Mir haen uf dere Tour drei Krokodil gseh. Eins isch an Land am bruete gsi. Leider isch aber s'Nescht scho laengscht weggspuelt worde, wege de Ueberschwaemmige wo mir ka haen, aber es Krokodil isch nit schlau gnueg, zum das z'begriffe. Die andere zwei Krokodil sin im Wasser gsi. Me het se wuerklich fascht nit gseh, es isch sehr faszinierend gsi. Mitem Boot simer ca. zwei Stund uf em Proserpine River umegfahre, aber fuer e langi Zyt haemmer denn nuet meh gseh. Nur no d'Spure vo Crocs im Schlamm am Ufer. Nach dere Tour uf em Fluss het's Lunch geh. So es richtigs aussie (australisches) BBQ wo ufeme Fuer am Bode gmacht worde isch. es isch serh yummie (fein) gsi! Es isch eifach unglaublich was fuer feins Esse me uf so Toure bekunnt!! Nach dem mir gstaerkt gsi sin, haemmer e Fahrt durch d'Wetlands miteme Art Zug gmacht. Doert haemmer Sache erklaert beko ueber d'Pflaneze, oder wie me zu Wasser chunnt, wenn me sich verirrt in sonere Landschaft. Es isch sehr interessant gsi. Mir haen au saemtlichi Wallabies gseh und au Kueh, wo doert gweidet haen. Die Kueh sin e Art "tropischi" Kueh, weiss nit gnau wie sie heisse, aber sie fuehle sich in dem Klima do mega wohl. D'Kueh haen e Buckel uf em Rugge und haengendi Ohre (so aehnlich wie die im Basler Zolli). Mir haen au e ganz seltene Vogel, Frogmouths, gseh. Das isch so e Art Eule, so aber es Muul wie en Frosch het, so Schnabelartig irgendwie (ich find es seht nit schoen us...). Es isch mega schwer gsi, die z'entdecke, wil sie doch recht tarnt sin in de Baeum. Nach dere Rundfahrt haemmer no en afternoon tea ka und Damper gaesse, so e Art Kueche. (Ich has Rezept, cha es denn mol probiere.)

Am Dag druff bi ich wieder mit mine neue Fruende us de Kirche zu de Cedar Creek Falls gange. De Wasserfall isch das mol staerker gsi und s'Wasser isch klarer gsi. Es isch richtig erfrueschend gsi, wil es so heiss und humid gsi isch.

Letscht Wuche bi ich fuer vier Daeg mit de Mavic und em Craig, mine Hosteltere, in "d'Ferie" gange. Miteme Motorboot simmer um die viele Insle go cruise. Das het mich sehr an d'Ferie mit em Wohnmobil erinneret und es isch sehr erholsam gsi. Uebernachtet haemmer in Buchte. Maengisch simmer ganz eleige gsi. Zobe haemmer gfischt ka und ganz vieli Fisch haen au abisse. Die meischte haemmer aber wieder zrugg gworfe. Mir haen au paar Schildkroete gseh. eini isch sogar ganz noech an unserem Boot uftaucht zum Luft hole. Mis Hostmami isch mega luschtig gsi, bi allem wo sie im Wasser gseh het, het sie gruefe:"Shark, shark, I see a shark!" Meischtens isch es denn aber e Stueck Holz gsi, wo im Wasser triebe het, oder d'Fantasie wird ihre was vorgspielt ha. Mir haen au gschnorchlet, an einem vo de beschte Spots do in de Gegend. Doert haemmer chli Fuetter mitgno zum de grossi Maori Wrasse, de Elvis, z'fuettere. Mi Hostvater isch chum im Wasser gsi mit em Fuetter (Reschte vom Mackrele Tuna wo mir gfange haen) und grad sin alli Fisch um uns umme gsi. Ich ha mi fascht nit getraut mich z'bewege, wil d'Fisch sin soooo noch gsi und soooo vieli, es isch mega idruecklich gsi. De Elvis het denn aber doch no si Fuetter beko und spoeter haemmer en au no us unserem Boot fuettere choenne. Unser Boot isch uebrigens sehr gross gsi, es het vier Kabine ka und zwei Badzimmer. Mir haen au en TV mti DVD-Player ka.

Jetzt goht's denn nit mol meh zwei Wuche und ich han Pruefige. Ich weiss immer nonig d'Date, was mi nervoes macht, wil ich mi Flug zrugg uf Brisbane muess bueche. Ich bi au immer no so beschaeftiged und so viel Luet waenn mi no treffe und lade mi zum Esse i, das freut mi natuerlich sehr, aber es wird mri denn verdammt schwer, dass alles do zrugg z'lo. Ich haett nie denkt, dass ich das je sage wird, dass ich gern no laenger do bliebe wuerd!! Ich mag de Ort zwar immer nonig wuerklich, es isch so e Art "Hass-Liebi", aber die Luet wo ich do kenneglernt ha sin eifach super und alli werde doch irgendwie Spure in mim Lebe hinterlo. Ich bi au chli meh am plane, wo ich no anechoennt, wenn ich denn zrugg in Brisbane bi. Ha mir so es Buech kauft, wo d'Backpackers (Hostel) dinne het. Das wirds mir denn au chli eifacher mache, zum entscheide wo ane z'go. Ich freu mi aber scho sehr zrugg uf Brisbane zu mine Verwandte z'go, wil mini Tante es Baby erwartet. Ich freu mi so druff!! :-)

So, jetzt no was zum lerne: Was ich bi schoenem Wetter nit deheime lo soett sin: togs (Bikini) und sunnies (Sunnebruelle). Un natuerlich trag ich bi dem schoene Wetter immer thongs. Das sin Flip Flops. Aber me nennt se do au Havaianas. Das isch aber eher wege de Marke und die isch eigentlich us Brasilie.

Ich wuensch euch e gueti Wuche. Hoff ich cha gli wieder was brichte. Momentan cha ich nit viel mache, wil s'Wetter eifach zu schlecht isch. Han au letschts Wucheend welle go schnorchle, bi zweimol am sechsi am Morge ufgstande. Wil am erschte Dag isch s'Telefon cho, dass es cancelled isch, also haett ich am Sunntig soette go. Am sunntig also wieder s'Gliche. Ich bi denn au abgholt worde, es het us allne Kuebel gschuettet und uf em Weg vom Auto zum Boot sin mir alli bis uf d'Knoche nass gsi. Uf em Boot isch denn entschiede worde, dass mir nit goen. :-( Immerhin hets mir grad no in d'Kirche glaengt. :-)

Also, machets guet und hebet sorg!!

euri Sarah

1 Kommentar 22.2.07 06:32, kommentieren

Nuet Speziells...

Hallo zaemme!

Die Wuche isch nuet speziells gsi, eifach das es mol fuer es Wieli ufghoert het regne und sit geschter wieder mega deftig regnet. Usserdem muen mir in de noeggschte 48 Stund miteme Zyklon rechne. De isch zur Zyt in de Noechi vo Cairns und goht in Pazifik use, aber er cha jederzyt abdreihe und wieder richtig Feschtland cho. Es isch sehr ufregend und ich bi gspannt, was ich de noeggschte paar Daeg passiert.

Am letschte Frittig het jede Schueler es Gricht vo sim Land muesse koche/vorbereite und mitneh. Ich han mich fuer Birchermuesli entschiede, obwohl ich das eigentlich nit gern ha. Wil ich mich in de Supermarket do nit z'rechtfind und d'Sache nit find, wo ich bruch, ha ich mich fuer e eifachi Version entschiede (oder was Neus erfunde? :-P ) und eifach Joghurt kauft. Denn ha ich en Oepfel, e Pfirsich und e Banane dri gschnitte und das ganze chli mit Milch verduennt und mit Zucker gsuesst. Ich weiss ehrlich gseit nit, wie es ako isch, aber ich ha es gern ka!! Ich wo suescht kei Joghurt mag und Birchermuesli nie iss!! :-) Es isch erstuunlich, was ich do alles esse cha, wo ich in de Schwiez nie abebecho wuerd, oder probiere wuerd. Es isch sehr interessant gsi, Esse vo Korea, Japan, Oesterrich, England und Brasilie z'probiere. Ich han de Ries vo Japan (wo eigentlich chinesisch waer lut em Rezept) und so e Creme vo Brasilie am liebschte ka. Mir haens sehr laessig ka und aschliessend denn es Ping Pong-Turnier ka und no Darts gspielt.

Am Samschtig het's us allne Kuebel gschuettet und ich han eifach nur use welle. Ich han beschlosse an Maert z'go, aber wo ich in Airlie Beach gsi bin, ha ich muesse feschtstelle, dass kei Maert isch. Vermuetlich sin die Luet, wo Staend haen, nit durecho, wil d'Strosse ueberfluetet gsi sin. Ich bi denn chli durch d'Laede und ha vor em Heimgo Herdoepfel kauft, damit e Roeschti fuers z'Mittag chan choche. D'Roeschti isch fein gsi, au wenn sie nit ganz typisch gsi isch. Ich han se denn au no mit de Mayo gaesse, wo ich uf de Geburtsdag beko han. Viellicht soett ich e Kochbuech afange schriebe, waer sicher interessant :-P

D'Situation do in de Region het sich sit em Wucheend wieder verbesseret, aber ich denk es isch nur e Frog vo de Zyt, bis d'Strosse wieder ueberfluetet sin und mri wieder vom Rescht vo de Welt abgschlosse sin. Es isch sehr interessant gsi, d'Nochrichte z'luege letscht Wuche. Do hesch gseh, wie Luet uf de Stross imene Wohnquartier Jetski fahre, wie Luet mit de Auto uf de Strosse feststecke, d'Stross het zwar meh an e Fluss erinneret. Es het au Warnige geh, wege Krokodil, wo halt es erwieterts Gebiet ka haen, wil d'Fluess ueber d'Ufer trete sin. Bi uns isch es doch nit ganz so extrem, aber zum Teil isch s'Wasser ueber mini Knoechel cho, wo ich uf em Weg in d'Schuel oder fuer heime gsi bin.

In de Schuel goht's mir do sehr guet. Ich lern wuerklich oeppis und mach Fortsschritt. Ich freu mi ufs Exame und freu mi au, de Kurs gli z'beende. Ich triff do super Luet und leider muess ich die Wuche scho wieder Abschied neh vo oepperem, wo mi doch sehr beidruckt het und wo mi immer wieder zum lache brocht het. Das isch eifach wuerklich haert und au die andere Studente werde sich wohl nie an de staendig Wechsel vo de Luet an dere Schuel gwoehne.

Zum Schluss muess ich no was Ergaenze. Ich han euch jo im letschte Bricht erklaert was es BBQ isch. D'Australier kuerzes au no gern als 'barbie' ab. Es neus Wort fuer die Wuche isch "plate". Es cha si, dass du zunere Party iglade wirsch und denn wird dir gseit: "Please bring a plate!" Das heisst nit, dass du en Teller soellsch mitneh, nei, es heisst du soellsch en Teller voll Esse mitneh, zum Bispiel e Kueche, oder Guetzli, oder Chips, etc. Das alles wird denn teilt mit de andere Luet. S'Luschtige isch, unseri einti Lehrerin het uns devo verzellt, dass sie au mol iglade worde isch und ebbe, sie haett en "plate" soelle bringe. Sie isch nonig lang z'Australie gsi und het nit gwuesst, was es wuerklich beduetet. Sie het's komisch gfunde, het aber en Teller (en leere) mitgno, wo sie an d'Party gange isch. Mir haen alli so muesse lache, wo sie uns das verzellt het. Ich denk ich ha chli z'fescht glache und bi denn gstroft worde, wil ich chli spoeter denn au ganz ueberrascht d'Kollegin gfrogt han: "I just need to bring a plate, no food?" :-D

Ich wuensch euch alles Gueti!! Muend euch viellicht chli gedulde, bis ich wieder schrieb, chan si, dass ich noeggscht Wuche mit mine Host-Eltere gang go segle um d'Whitsundays umme... Wuerd mi freue wenns klappt, bruch dringend e Abwechslig!!

Demfall, liebi Gruess us de Wetsundays!!

euri Turtle (wie sie mi do amigs nenne...) 

7.2.07 06:13, kommentieren

Durch den Monsun...

Hi there!

Isch wieder mol Zyt, chli was z'brichte. Mini Wuche isch ganz ok gsi, s'lauft immer chli was und trotzdem langwiel ich mi amigs no. S'Wetter isch sogar uebers Wucheend besser worde und ich han natuerlich grad wieder en Sunnebrand igfange!! Es isch eifach so extrem, wie me ufpasse muess, dass me gnueg Sunneschutz het. Vermuetlich liets aber au an de Creme, wil wenn ich keini han, han ich kei Sunnebrand. Sit em Zischtig regnets wieder. Es isch richtig monsunartig mit Wind. Das heisst me goht use mit em Schirm, aber de Wind machts fascht unmoeglich, dass me trocke bliebt. Und es schuettet richtig abe sit ca. 24 Stunde jetzt. Es fasziniert mi no sehr! Mini Lehrerin het gmeint zwei Zyklon irgendwo uf em Pazifik waere Grund fuer das Wetter. Und mi Host-Dad het gmeint, de Rege choennt zwei Wuche no adure!! Super!! ICh bruch guets Wetter zum go schnorchle und ufs Meer usechoenne. Das Wucheend wird ich aber uf em Feschtland bliebe, ich woett e Krokodil-Safari mache. Hoff es wird was...

Ich woett euch nit mit em Wetter und so langwiele, drum verzell ich euch, was ich so erlebt han letscht Wuche. Am Frittig isch "Australia Day" gsi. Ich han mich sehr uf de Dag gfreut, usserdem isch es de erscht sunnigi Dag sit langem gsi (De Wetterfrosch isch wohl Australier?). Es het gheisse es het live Musik und Breakfast BBQ und Lunch an de Lagoon. Wo ich doert mit mine Mitschueler ako bi (mir haen kei Schuel ka denn) isch aber niemerts doert gsi, mir sin praktisch die einzige an de Lagoon gsi. Komisch, isch alles scho umme? Mir haen uns nuet debi daenkt, haen chli gschwumme und relaxt, es isch u heiss und humid gsi!!! Spoeter haemmer denn mtibeko, wie oepper gseit het, dass s'Fescht an e andere Platz verschobe worde isch, wil s'Wetter so unsicher gsi isch. Super!! Naja, isch egal, mir haens trotzdem laessig ka und an dr Lagoon hets vieli Luet ka, mit de australische Flagge und mit em Southern Cross ufgmolt, etc. S'isch laessig gsi!! Am Nomidag simmer denn zunere Mitschuelerin heime. Doert het ihri Familie Luet iglade und es het ganz viel Persone ka. S'isch laessig gsi, wil es so viel Australier ka het und trotzdem so international gsi isch, wege uns Studente. Au im Garte het's ueberall Australie-Flagge ka und de Dresscode isch "green-yellow" gsi. Mir haen es riese BBQ ka und spoeter haemmer denn no Cricket gspielt. Ich han aber nur zuegluegt :-) Ich ha no recht lang mti de Australier doert gredet, han aber muesse feststelle, dass jede vo ihne urspruenglich us Europa chunnt. Also d'Eltere sin mit de Kinder igwanderet, wo sie no chlei gsi sin, oder bevor sie gebore worde sin.

Am Samschtig haemmer e grossi Party bimene Mitschueler us de Schwiez deheime ka, er het Sturmfrei ka. Es isch mega laessig gsi!! Bi ihm deheime het's en Pool, e Ping-Pong-Tisch und en Billardtisch. Mir haen natuerlich au es BBQ ka und es isch viel trunke worde (nit vo mir, ich bi chrank gsi und ha Medis gschluckt). Es het so guet do, eifach mol nit an de Lagoon z'si und wo anders abhaenge z'choenne, usserdem het me e mega schoeni Sicht ufs Meer ka!

Am Sunntig bin ich in d'Kirche und denn am Nomidag bini mit paar neue Fruende vo de Church zu de Cedar Creek Falls. Das isch so en kleine Wasserfall und e kleins Seeli. Isch schwer zum erklaere. Es isch mega agnehm gsi, im Wasser z'schwimme. Es isch nit sehr kalt und nit allzu warm gsi, also genau richtig. Aber ich denk gwuessi Australier wuerde behaupte es isch A****-kalt gsi :-) Die haen sich agstellt, das glaubed ihr nit... Wegem Rege wo mir die vorige Daeg immer ka haen, het's denn au en Wasserfall ka. S'isch so relaxing gsi!! Irgendwie haen d'Australier denn usegfunde, das min B-Day gsi isch, so haen sie gfunde, muess gfyyrt werde. Zobe simmer imene Restaurant go esse und ich han nomol Gschenkli und Blueme beko, richtig verwoehnt haen sie mi. E Kellnerin het denn no e Kueche brocht und afange singe und die isch denn richtig abgange mit "Hipp Hipp Hurray", etc. isch so cool gsi :-)

Am Wucheend isch no mini Host-Sister uszoge. Ich bi sehr froh drueber, wil sie het Problem mit mine Host-Eltere ka und es isch eifach immer so e agspannti Atmosphaere gsi. Jetzt isch es wieder voll easy und locker. Ich bi also au do wieder es Einzelkind und saufroh drueber. :-)

Geschter bini mit mine Mitschueler in Sailing Club go esse. S'Esse isch ganz ok, de zahlsch 15.- und kasch de Teller voll biege mit allem wo de kasch kriege und es Dessert gits au no. Denoch simer denn no in e Club, ins Beaches. Bin s'erschtmol doert gsi. S'isch sau cool, Oldies sin gloffe und d'Stimmig isch super gsi!

Ich moecht mi entschuldige fuer mini Grammatik. Ich han langsam richtig mueh mit englisch + duetsch. Also mit englisch hani weniger Problem, aber duetsch isch Katastrophe. In dr Schwiez muess ich glaubs zerscht en Duetschkurs bsueche :-P

Wer gern mol chli mit mir per MSN quatsche woett, soell sich bitte per Kontaktformular bi mir melde, denn cha me was abmache. Und wer mini aussie Natelnummere woett, soell sich doch au bitte so melde.

Zum Schluss no was: Ich merk immer meh, isch lern KEI englisch do sondern australisch. Das git euch jetzt die einmaligi Chance do durch mi au paar Woertli z'lerne. D'Australier benutze au viel Abkuerzige, alles wird abkuerzt. Also, Lektion 1: BBQ, dass isch mi Beschaeftigung Nummer 1 bi schoenem Wetter, etc. kei Party ohni BBQ. Aber was heisst BBQ? Es BBQ isch usgschriebe: Barbecue und beduetet Grillarty, aber me bezeichnet demit au de Grill, uf dem me s'Fleisch und s'Esse grillt. So, lerned das brav, ich mach denn es grosses BBQ im Summer, wenn ich zrugg bin... :-P Bim noeggschte Blogitrag wird ich euch oeppis Neus lerne... :-)

Ich wuensch euch e gueti Zyt. Ich freu mi ueber jede Kommenater und ueber jedes Lebenszeiche vo euch, also loend was hoere!! :-)

See you, Sarah

1 Kommentar 31.1.07 23:32, kommentieren

Rege, Rege, Rege...

Hallo zaemme!!

Isch mol wieder an der Zyt, euch was z'brichte! Ich han viel erlebt in der letschte Wuche!

D'Schuel ishc immer no ok!! Ich ha langsam mehr Kollege und es isch luschtig mit ne. Am Donnschtig haemmer es Abschiedsbarbeque ka. Es isch ganz nett gsi, aber leider haen uns grad au Luet verlo, wo mir doch sehr ans Herz gwachse sin und mi au amigs ufbaut haen und mi eifach zum lache brocht haen! Ich hoff ich cha mit dene in Kontakt bliebe und wer weiss, viellicht gang ich mol uf Brasilie oder Thailand go die Luet bsueche.

Am Frittig haemmer unseri Friday Excursion ka. Doert mache mir immer was speziells. Mir sin go Tennis spiele. Es isch mega heiss gsi uf em Platz, aber mir haen Spass ka!! Ich kapier d'Regle leider immer nonig (Noemi, viellicht chasch mir das mol no chli noecher bringe?). Ich han aber zum Glueck en mega geduldige Partner ka (mir haen in zweier Grueppli gspielt) und er isch wuerklich guet gsi und so haen mri uns super ergaenzt!

Am Samschtig bin ich mit einere us Brasilie go Kayak fahre. Eigentlich haemmer jo welle en ganze Dag go, aber wegem Wetter haemmer nur en halbe Dag choenne go. Ich bi zerscht chli enttuescht gsi, aber im nochhinein mega froh! Mir haens nit so im Griff ka, dass heisst, mir sin langsam gsi und haen am Schluss en separate Guide brucht, wil mir so Problem ka haen. Ich weiss nit, oebs am Kayak glege het, oder an uns... Mir haen denn ufere kleine Insel pause gmacht und doert haemmer choenne schnorchle und haen Lunch gaesse. S'Schnorchle isch ok gsi, es het eifach guet do, mol wieder im Meer z'schwimme, aber gseh haemmer nuet. Uf em Heimweg hets denn au no agfange regne und es het au chli Welle ka, was das ganze zunere wacklige Aglegeheit gmacht het. Schildkroete haemmer leider au nit gseh... Im Grosse und Ganze isch es ok gsi, ich denk aber nit, dass ich es nomol mach.

Am Dag druff bi ich mitere Japanerin go Ocean Rafting mache. Ich sag euch, dass ich so cool!! Das isch so mega genial gsi. S'Wetter isch zwar voll grusig gsi am Morge und mir haette fascht abgseit, aber wil sie d'Tour abote haen, haemmer denkt goemmer halt doch!! Und es het sich glohnt. Es isch zwar sehr Wolkeverhange gsi, aber es het nit gregnet ka!! Mir haen so viel Spass ka. Bi der Whitsunday Island haemmer en kleine Bushwalk zumene Lookout gmacht. Uf em Weg doert ane hets so intensiv nach Eukalyptus gschmoeckt, mega cool, wie es Halstaefeli :-) Bim Lookout simmer chli ueber d'Ussicht informiert worde. Me seht ueber de ganzi Whitehaven Beach. Wil aber Fluet gsi isch, isch es nit ganz so schoen gsi, wie uf de Foetteli vo de Poschtkarte, wo bi Ebbe gmacht worde sin. Uf em Rueckweg zum Boot haemmer zwei Eidechse gseh, die sin mega gross gsi und mega schoen!! Denn isch es wieter zum Whitehaven Beach gange, wo mir Lunch ka haen. Mmmmh, isch de guet gsi!! Und denn uf em Heimweg simmer no zu zwei guete Schnorchelplaetz. D'sunne het denn no richtig gschunne ka und me het richtig wiet gseh unter Wasser. Unsere super Guide het uns alles ueber d'Koralle und d'Fisch verzellt. Mir haen d'Fisch gfuetteret ka und durch das haemmer au vieli us ihrne Versteck glockt. Es sin so schoeni Fisch gsi, so bunt und alli Groessene. Es isch au e Maori Wrasse ko, de isch fascht so gross wie ich. Das isch de hammer, wenn de Aug in Aug mit dem riese Fisch bisch und en au alenge kasch. Wow!! Bim zweite Ort het denn s'Wetter wieder zue gmacht, aber mir haen glich Spass ka! Grad wommer denn us em Wasser sin, hets richtig afange aber regne. Um uns umme sin Insle gsi, vom eint Moment uf de ander het me nuet me gseh, es sin nur no mir uf em Meer gsi und die dicke Wolke mti em heftige Rege!! Es mega Erlebniss!! Ich ha mi glaubs no nie so sehr ab em Rege gfreut, wie do in Airlie Beach und uf em Meer!!! Denn simmer mit unserem schnelle Boot wieder heime und nomol haen unseri Guide uns ueber d'Insle ufklaert und mir haens mega glatt ka!! Das isch definitiv de beschti Dag gsi, wo ich do in Airlie Beach ka han!! Ich wird gli wieder go Ocean Rafting mache, es isch so toll, und do sie zwei Toure abiete, wird das sicher lohnenswert si!!

Sit letschter Wuche haemmer recht heftige Rege, das isch so cool!! Es isch amigs mega lut und d'Strosse sin chli ueberfluetet und me hoert d'Froesch. D'Wetseason het also agfange, was au heisst, mir muen uns uf d'Zyklone vorbereite. Ich faend das no sehr ufregend... Mol luege, oeb sich paar bilde und zu uns koemme...

Geschter ha ich min Geburtsdag gfyyrt. Ich han chli Angscht ka vo dem Dag, wil ich ha denkt ich bi eleige und so, aber es isch super gsi!! Ich han sogar Gschenkli beko und was fuer tolli!! Es Dankschoen au an alli, wo mir gschriebe haen und an mi denkt haen!! Bi chli stuermischem Wetter ha ich an de Lagune wohl mini groeschti Geburtsdagsfyyr ka. Eifach wil alli Schueler debi gsi sin. Es ishc mega laessig gsi, s'Happy Birthday in viele verschiedene Sproche gsunge z'beko. Die wo mi kenne, wuesse jo, dass ich das nit so mag, aber ich han Freud ka. Han denn au no e kleini Red muesse halte, haen zum Glueck nit viel mitbeko...  S'Barbeque (BBQ) isch fein gsi. Unser Oesterricher het super grilliert. So ha ich ganz viel feini Sache z'aesse ka. De Sho Go, unsere 16-joehrig Japaner, het mir en Teller mit diverse Fruecht brocht ka. Denn hets grossi Diskussione geh, wie jetzt wohl jedi Frucht heisst und wie sie in dr jewilige Sproch heisst. Es isch mega fein gsi!! Und denn nach em Esse hets afange regne. Denn simmer ins Magnums (Pub). Doert han ich denn mini 20 Kerzli uf mi Kueche gsteckt und sie au alli ufs mol choenne usblose :-) Es isch en super Dag und Obe gsi. Ich haetts mir fascht nit schoener choenne vorstelle!! Wenn ihr alli no debi gsi waered, waers aber -no besser gsi!! 

Mini Plaen fuers no chli Umereise werde immer konkreter. Es isch guet Moeglich, dass ich no chli verlaengere und das schoene Land no bitz gnauer alueg!!

So, das isch es fuer die Wuche... Danke vielmols nomol fuer euri Mails und Sms fuer mi B-Day. Und danke vielmols au fuer d'Kommentaer und Gaeschtebuechitraeg vo euch!!

 

1 Kommentar 23.1.07 06:37, kommentieren

Scho wieder e Wuche umme!!

Halli Hallo!!

Es isch jo scho wieder e Wuche umme!!! Wow, d'Zyt goht so schnell verbi, das isch unglaublich!! Ich ha mi besser iglebt und fuehl mi wohler. Ich ha paar "Fruendinne" gfunde, aber es isch alles sehr oberflaechlich. Ich vermiss es eifach mit euch, mini liebi Familie und mini liebe Fruende, z'rede. Was eifach kompliziert isch, isch das meh nit eifach so druff los rede cha, wie deheime, wo alli die glich Sproch rede. Entweder me wird selber nit verstande, oder me verstoht sis gegeueber nit. Das isch sehr schad, aber zum Teil au luschtig, wil me wuerklich mit Haend und Fuess probiert sich z'verstaendige.

Wo ich letscht Wuche heimcho bi vo de Schuel het mi Gaschtfamilie gmeint, dass es Koreanerin zu uns wird cho. Es het kei anderi Familie, wo sie neh cha, wil sie allergisch uf Huend und Chatze isch. Ich han scho angscht ka, dass ich stattdesse zunere Familie mit Huend oder so muess. Aber jetzt sin mir beidi halt bi dere Familie. Es isch eifach chli muehsam, wil mir nur ei Bad haen im Huus und bi vier Persone wirds denns cho chli eng... Ich bi so froh, dass die Familie keini Huend het. Letscht Wuche sin mer zweimol Huend nochegrennt und ich han doch recht schiss ka. D'Luet in unserer Stross sin eigentlich scho fruendlich, aber ebbe, dass mit de Huend soett nti passiere. Falls es doch passiert, darf ich es mim Host-Dad saege und er luetet neume a, und denn werde die Luet kontrolliert und muend viellicht ihri Huend abgeh!!

Am Mittwuchzobe isch unseri Friday-Activity gsi (defuer haemmer am Frittignomidag frei ka...). Mir sin in es Restaurant wo e Trivia Night gsi isch. Das heisst es sin uns 26 Froge gstellt worde, alli fange miteme andere Buechstabe a. Die Froge sin mega schwer gsi, aber mir haen alli Spass ka. Schlussendlich simmer dritti worde. Als Pries haemmer e Verguenschtigung fuer en Usflug beko. Ich freu mi mega druff, mir haen uns fuer Ocean Rafting entschiede. Aber ich muesst miteme Koreaner go und zerscht woetti no paar Meitli motiviere zum mitko...

Am Frittigzobe haen mir Schueler es BBQ bi de Lagune ka. Isch no laessig gsi, aber die andere trinke halt doch chli z'viel Alkohol fuer min Gschmack... Wo ich denn heimcho bin nach de 12 z'Nacht bi ich recht verschrocke, wo ich e schwarze ca. Fuenfliber grosse Schatte in mim Zimmer gseh ha. Nach em zweite Blick ha ich gseh, es isch kei Spinne - Gott sei Dank - aber halt so en Kaefer, ha mir nuet debi denkt. Das Viech isch denn aber doch immer noecher zu mim Bett krabbelt oder grast, also ha ich es use werfe welle us mim Zimmer. Alli Tuere sin scho zue gsi und so, also ha ich es eifach in hinterschte Egge vom Wohnzimmer gworfe... Am noeggschte Dag ha ich das miner Gaschtfamilie verzellt. Jetzt ha ich nit nur e Kaefer im Zimmer ka, sonder e Cockroach, was uf duetsch so viel wie Kuchischabe heisst. Isch also doch besser gsi, dass ich das Ding usegworfe han :-)

Am Samschtig bin ich mitere Brasilianerin, de Carina, uf e 2 Island Cruise. Mir sin uf Hamilton Island und zum Whitehaven Beach. S'Wetter isch leider total sch..... gsi, was uns chli uf d'Luune gschlage het. Hamilton Island isch voll langwielig gsi, wil mir haen z'wenig Zyt ka, zum alles gnau aluege oder zum schwimme. Und denn het's no gheisse, d'Bedingige vom Wetter und Wasser sin zu schlecht, mir choenne nit zum Whitehaven Beach. Mri sin aber trotzdem mit em Schiff denn doert ane und haens probiert. Es isch kei Problem gsi zum Glueck. Doert haemmer trotz wenig Sunne schoen ins Wasser gseh, wo ich no nie in soneme blau erlebt han. Mir haen Roche gseh und no so anderi schwarzi Schatte im Wasser. De Sand an dem Beach isch so soft, das ha ich no nie erlebt, wenn ich s'noeggschtmol doert ane gang, woett ich e Dose mitneh, damit ich chli Sand stibitze chan. Mir haen denn chli badet, aber s'Wasser isch sau chalt gsi. Spoeter hets denn no chli gregnet. Mini Foetteli sin nit so toll worde, d'Sunne het eifach gfehlt... Aber ich wird sicher mitere andere Company nomol zu dem Beach go, wo ein vo de schoenschte uf de Welt si soett. Zobe isch denn d'Koreanerin ako. Es isch ganz e liebi und schuechi, aber mir haens no recht guet zaemme. Mir haen es BBQ deheime ka und im Garte gaesse. Ihr glaubet gar nti, wie verstoche ich bi. Die Moskitos do sin sehr aggressiv!!

Am Sunntigmorge bin ich denn in d'Kirche gange. Isch ganz laessig gsi mit Hillsong Musik :-) D'Luet sin sehr fruendlich gsi. Was ich aber am beschte find, ich doerf noeggscht Wuche in d'Bandprob go ineguexle und chan viellicht denn au mit ihne am Sunntig singe :-)

Huet am Morge ha ich vor em Igang miteme ander Schueler gredet und denn ha ich uf eimol so e Art Blatt an de Wand bemerkt. Jetzt isch das es Insekt gsi, wo wie es gruens Blaettli usgseh het. Ich ha das denn im andere Student gseit und er meint nur:"Ja, das ist das Blatt und an der anderen Wand ist das Aestchen." Ich ha mi umdreiht und an dr andere Wand isch wuerklich so es Viechli gsi, wo wie es Aeschtli usgseh het. Han das mega toll gfunde. Die sin so cool, und ich han leider mini Kamera deheime glo... :-( Huet sin nomol zwei Schwiezer cho, es isch es Ehepaerli, wo scho chli aelter isch und sie sin vo Zueri. Jetzt simmer 7 Schwiezer do und ich wart immer no uf es Girl in mim Alter...

Ich mach mir langsam Gedanke ueber mini Zyt nach em Sprochuffenthalt. Also was ich alles no mache wird, wenn ich wieder zrugg bi mine Verwandte in Brisbane bin. Ich han no paar Sache, wo ich doert seh will, aber min Wunsch, ins Outback z'go, und no chli umme z'reise wird immer groesser!! Ich hoff so, dass ich no oepper find, wo au umme reise tuet, oder das es suescht e Loesig git!! Ich han do in Airlie Beach paar jungi Fraue troffe, wo eleige reise und sehr gueti Erfahrige demit gmacht haen, mol luege, oeb das was fuer mi waer...

Ich hoff es goht euch guet!!

Gruess us em heisse Australie!!

 

2 Kommentare 15.1.07 05:59, kommentieren