Surfe in Maroochydore

 

Nachdem ich e schöni Oschtere mit mine Verwadte und ihrne Verwandte verbrocht han, bi ich denn am Oschtermentig mit Greyhound (dem berüehmt berüchtigte Busunternehme) uf Maroochydore an d'Sunshine Coast gfahre. Dört bi ich vo öpperem vom Backpacker (sowas wie Jugendherberg) abgholt worde. Ich ha imene sechser Zimemr gwohnt während dere Zyt. Mir sin alles Fraue in mim Alter gsi und sin au alli vo Mentig bis Frittig bliebe. Das isch voll glatt gsi mit dene. Sie sin vo England und Amerika cho.

Am nöggschte Dag hani denn mini erschti Surftsund ka. D'Bedingige sin leider nit so guet gsi, wil es so fescht gwindet het. Das isch würklich extrem gsi und wenn mir usem Meer ko sin, simmer grad mit Sand ipaniert worde. Ich has denn au paarmol feritg brocht, füt e Moment ufzstoh, aber han trotzdem chli Zwiefel ka, öb ich evt. nit scho zu alt bi für de Sport. In de Stund het's ebbe alles so kleini kinder ka und die sin s'erscht Mol uf em BRett gsi und hän super stoh chönne und hän au d'Welle ritte chönne!!

Am nöggschet Dag hani denn trotzdem gfunde ich gang nomol go surfe, schliesslich isch das de Grund gsi, wieso ich an d'Sunshine Coast gange bin. Es het viel besseri Bedingige ka und do mir nur zu zweit gsi sin, het sich de Leherer viel zyt für mich chönne neh, die ander isch au scho chli besser gsi und het nüm so viel Hilf brucht. Ich hans würklich viel besser chönne als am Dag vorher und han richtig Spass ka.

An mim letschte volle Dag in Maroochydore bini denn nomol go surfe. D'Gruppe isch recht gross gsi und de Lehrer het sich um die neue müesse kümmere. Ich han aber praktisch kei Hilf me brucht. Ich han chönne erkenne, wo die guete Welle sin und ha sie denn au verwütscht und ha chönne ufstoh und se au ritte. Ich han au immer realisiert, was mini fehler gsi sin udn ha mi so selber chönne verbessere und korrigiere. Mi Lehrer isch ganz begeischteret gsi. Am Endi vo de Stund het er mir denn gseit, dass ich keini Stunde me bruch, sondern jetzt selber chan go surfe. Leider isch es ebbe min Dag vor de Abreis gsi, was eigentlich schad gsi isch, wil ich hätt halt würklich no gern gsurft!! Wötts uf jedefall gli wieder mache, isch eifach en hammer Sport!!

De letschti Obe hämmer alli vom Zimmer no zämmä verbrocht, mir sin alli mega truurig worde, dass mir uns scho müend trenne und jede sin eigete Weg go muess. Han aber no Konatkt zu dene Ladies und wer weiss, viellicht gseh ich sie wieder mol, schliesslich hämmer und alli zunenander iglade :-)

Am Frittig bini denn wieder zu mine Verwandte. Dört han ich denn no mini letschet Däg gnosse bevor es denn am 18. April ins Flugi gange isch, wo mi denn uf Frankfurt brocht het!! Dört bini am Dag druff guet acho und mit em Zug bini denn gli in Basel gsi, wo ich vo mine Eltere und miner beschte Fründin empfange worde bi!!

Ich han do in Basel denn no chli meh als e Wuche frei ka, was mi total glangwielt het und eifach alles het mir gfehlt!! Sit Afangs Mai schaff ich jetzt im Tierpark. Ich gniess es sehr, aber es isch eifach no total ungwohnt für mi so streng z'schaffe und au so e grosse Verantwortig eleige z'trage.

Jetzt chunnt's mir scho wieder wie e Ewigkeit vor, dass ich in Australie gsi bin und s'ganze schient meh e traum z'si, en wunderschöne. Mini Bilder sin aber de Bewies, das es würklich real gsi isch. Ich bi sehr dankbar für die Zyt, ich denk es het mi no recht prägt und wird unvergesslich si. Ich wött kei Sekunde misse, au nit die, wo es mir schlecht gange isch und mi s'Heimweh blogt het. Ich würd simemr wieder mach eund cha nur jedem empfehle, mol so öppis go mache, es isch eifach lohnend!!

Ich weiss es nonig, wie es mit dem Blog wieter goht, uf jedefall wött ich "danke" säge fürs ine luege, hoff es isch für euch informativ gsi und ihr sit trotzdem chli uf em Laufende gsi!!

 

Tschüss

 

1 Kommentar 6.5.07 19:33, kommentieren

4WD-Tour

Min letschte Teil vo miner Reis isch e Vierradatrieb-Tour gsi. Zu miner Überraschig bin ich die einzigi gsi, wo an dere Tour teilgno het, aber sie het zum Glück trotzdem stattgfunde. Isch chli komisch gsi, nur eleige mit em Fahrer unterwegs z'si und mir sin eigentlich nur uf so kleine Strössli irgendwo im bush gfahre, wo nit teert gsi sin. Eimol hämmer sogar en Baum müesse vo de Stross zieh und denn wo mer am endi vo dere Stross gsi sin, isch dört es Schild gsi, wo gseit het, dass die Stross gspeert isch - super! Es isch zum Glück alles guet gange und mi Fahrere het sich super uskennt. Mir häns no recht guet ka, er isch 60 Johr alt und het mir immer vo siner Family verzellt!! Die Tour isch nur 4 Däg gange und zwar vo Sydney direkt heime zu mine Verwandte. Die erschti Nacht hämmer so ziemlich uf em Land verbrocht, ich weiss nüm wie de Ort gheisse het. Es isch s'Huus vom Bsitzer vo dere Gsellschaft gsi und es het no es anders Huus dört ka. Vo de Landschaft her und vo de Rösser und Chüeh, wo es dört ka het, het's mi mega an s'Jura erinneret! Han grad chli Heimweh beko. D'Frau, wo dört gwohnt het, het uns e super BBQ gmacht und es het richtig guet to, mol wieder so öppis feins z'ässe. Usserdem sin dört no drei Engländerinne gsi, und so ha ich denn doch au no chli Gsellschaft ka. S'Huus, wo mir drin gschlofe hän, isch mega alt gsi. Au d'Möbel sin richtig antik gsi, aber no tiptop! In mim Badzimmer ha ich no paar Frösch gha. Isch no luschtig gsi, immerhin keini Spinne :-P Vor em z'Nachtesse bi ich no chli an Bach ane und dört ha ich denn dörfe Schnabeltier beobachte. Schiens muess me mega Glück ha zum die z'seh, aber dört het's nur so gwimmelt vo Schnabeltier!! Ha ich richtig cool gfunde! D'Wallabies sin au mega nöch cho! Wär gern no länger dört bliebe!!

Am nöggschte Dag isch es richtig Coffs Harbour gange, au wieder uf so kleine Strössli. Dört hämmer immene Resort übernachtet. Ich cha nit viel devo brichte, wil mir sin de ganz Dag nur Auto gfahre! 

Denn simmer am Dag druff richtig Surfers Paradise gfahre, mir hän denn no en halt in Byron Bay gmacht, das isch ganz bekannt für Surfer, wie gern wär ich au dört bliebe :-) Aber ebbe, mir hän denn wieter müesse und hän denn imene Motel übernachtet. Dört het's denn no en kleine Pool ka, endlich hani mol chli schwimme chönne!!

Und denn isch es grad Heim gange am näggschte Dag. Bi denn au froh gsi, wieder zrugg z'si!! Die Tour isch scho guet gsi, aber bisch halt de ganz Dag eigentlich im Auto, wa sich chli müehsam gfunde han. Hans mir scho chli anders vorgstellt und vorallem mit andere Lüt! Aber im Grosse und Ganze isch es ok gsi!! Halt au mol was ganz anders!

 

 

 

1 Kommentar 6.5.07 18:45, kommentieren

Alice Springs und Outback

 

Nach Sydney isch es endlich uf Alice Springs gange, wo ich fünf Däg im outback verbrocht han. De Flug dört ane isch sehr interessant gsi. Eifach krass z'gseh, wie d'Vegetation am Bode immer weniger wird. Schlussendlich het's keini Strosse und Hüser meh am Bode ka. Me het eifach nur no roti Erde gseh und do und dört mol es Büschli. Isch chli es komisches Gfühl, so ins Nüt use z'fliege. Ich ha mir immer chli sorge gmacht, dass es zu heiss chönnt sie für mich. Zu dere Johreszyt wo ich dört gsi bin, muess me eigentlich scho mit ca. 40°C oder meh rechne. Naja, s'erschte wo ich denn gmacht ha, wo ich ako bin, isch gsi en Pulli azieh :-) Ich muess sege, ich ha an keinem Ort (usser in de Blue Mountains) so fescht gfrore, wie im Outback und es het au niene so fescht gregnet (usser in Airlie Beach) wie im Outback.

Am erste Dag ha ich recht Stress ka, wil ich eigentlich nur so 3/4 Stund Zyt zwüschem ako und der erschte Tour ka han. De Zytplan isch aber voll ufgange und ich bi pünktlich gsi. Zerscht isch d'Tour denn zu de Telegraphe Station in Alice Springs gange, dört isch de eigentlichi Ursprung vo dere Stadt gsi. Spöter isch es zum Royal Flying Doctor Service gange. Dört hämmer e Film über dene ihri Arbet chönne luege und es het no so e Art Museum ka. S'isch sehr interessant gsi und esisch guet zeigt worde, wie sehr d'Lüt im Outback uf de Service agwiese sin, wil es im Outback nur in Alice Springs es Spital git und es git Lüt wo hunderti vo Kilometer devo eweg entfernt wohne. Nach dem isch es zur School of the Air gange. Dört isch zeigt worde, wie d'Kinder im Outback per Funk unterrichtet werde. Das isch sehr interessant gsi, ich chönnt mir gar nit vorstelle, so in d'Schuel z'go. Mir sin denn no in es Reptile Centre gange. Dört hämmer Eidechse und Schlange chönne alänge und natürlich ganz vieli Reptilie au aluege chönne. Au dört het's wieder einigi vo de giftigschte Schlange ka. Uf em heimweg hämmer no uf em ANZAC Hill halt gmacht. Das isch e Hügel mit Erinnerigssache für d'Kriegsopfer. Vo dört obe het me e super Ussicht über d'Stadt ka. Also ich find eigentlich, das Alice meh e Dorf isch. Es seht recht klei us und ich frog mi, wo all die 27'000 Iwohner lebe sölle. Ich han uf dere Tour ganz vieli Aboriginals gseh, was ganz es komisches Gfühl isch, wil ich sit Ewigkeite keini schwarze Lüt meh gseh han. Es het mich mega truurig gmacht, dass die meischte ganz verlumpt uf de Strosse und am "Fluss" gsässe sin. Es isch mer denn au nti so wohl gsi, aber eigentlich muess me nit Angscht ha vonene. Es isch eifach so truurig, die Lüt eso z'seh. Australie isch jo eigentlich dene ihres Land und sie sin so verbunde mit ihrer Kultur, dass sie immer nonig ganz begriffe, was mir wiesse mit ihrem Land gmacht hän.

 

Am nöggschet Dag isch es uf Yulara gange. Uf em Weg dört ane hämem rnit vieli Autos oder süscht was gseh, me isch dört würklich im nüt usse! Dört hämmer in de Resort Siedlig übernachtet. Zerscht isch es aber no zu de Olgas/ Kata Tjuta gange. Das sin au so Hügel oder Steiformatione, wo au rot sin. Wo mir dört chli sin go laufe, het's denn ganz plötzlich ganz fescht afange regne. Mir sin denn grad im Valley of the Winds (Tal der Winde) gsi und es het mi eimol fascht eweg blost ka!! Klatsch nass hämmer uns denn vo dört uf de Ruckweg zum Car gmacht, damit mir au jo pünktlich zum Sunneuntergang chömme! Uf em Weg zrugg dört ane, hämmer Wasserfäll gseh, wo d'Felse abe cho sin. Das isch ganz untypisch dört und chuntn viellicht eimol im Johr vor!! Unseri Fühererin isch mega usgflippt. Sie het glaubs chli meh Freud als mir ka! Mir hän denn spöter bim Car chli Sekt oder sowas beko und hän de schöno Sunneuntergang bewudneret, Also es isch so gsi, dass me wege de Wolke Decki nüt gseh het, aber mir hän unsere Spass trotzdem ka, wil mir sin e glatti Gruppe gsi!

 

Am Dag druff hani müesse früeh ufstoh, wil mir de Sunneufgang bim Ayers Rock/ Uluru sin do luege. Au do isch leider nit würklich e Sunneufgang gsi, wil es wieder gregnet het. Me het nit mol de oberi Teil vom Ayers Rock gseh, wil de ganz dick in Wolke ighült gsi isch! So nass wie ich denn scho gsi bin, bini denn uf de Basewalk gange. Do lauft me eifach miteme Führer chli am Uluru entlang und er verzellt eim chli über d'Kultur vo de Aborigines und zeigt eim, wo was für e Ort isch. Das isch sehr interessant gsi, aber wenn ich ehrlich bi, het me scho fascht um de Uluru umme schwimme chönne, statt laufe :-)

Zobe simmer denn de Sunneuntergang bim Uluru go aluege. D'Wolkedecki isch chli ufgange, aber es isch immer no zu bewölkt gsi eigentlich. Es isch lang nüt passiert und es isch luschtig gsi, die viele Lüt z'bebobachte, wie sie Fötteli vo sich mit em Uluru mache lo hän. Die sin richtig kreativ worde... Denn nach em offizielle Sunneuntergang het sich denn doch die Farb vom Uluru afange verändere. Es isch nti so ganz extrem gsi, wie es hätti si sölle, aber immerhin!! Und de Himmel hinter uns isch ganz kitschig pink worde!! Es isch sehr idrücklich gsi, au wenn es wieder sehr kalt gsi isch dört!!

 

Am nöggschet Dag het dennendlich d'Sunne gschunne und es isch bitzli warm gsi. Am Morge hani sozusage frei ka, dass heisst ich ha mol usschlofe chönne! Ich bi denn no zumene Lookout gange und vo dört hani nomol lässigi Bilder vom Uluru und de Kata Tjuta mache chönne. Am Nomidag isch es denn richtig Kings Canyon gange. D'Fahrt dört ane isch ca. vier Stund gange und isch wieder eifach nur im Nüt gsi! Ich bi no recht glücklich gsi, wil die Tour wo am früehe Morge dört ane hätt sötte, het wege überfluetet Strosse nit chönne stattfinde. Mir sin denn aber gange und s'Wasser isch nüm ganz so höch gsi! Wo mer dört acho sin, simmer am Bach entlang in d'Schlucht gloffe. Das isch so z'säge s'ilaufe gsi, wil am nöggschet früehe Morge simmer uf de Canyon uffe gange und obe entlang gloffe. Zum z'Nacht han ich dört es Vermöge usgeh. Immerhin hani chli Gsellschaft ka, wo mir denn au no ihres Kangoroofleisch adreit hän. Froged mi bitte nit wie es gschmeckt het, ich han echt kei Ahnig, wil d'Marinade eifach zu stark gsi isch!

 

So, an mim letschet ganze Dag im Outback isch es denn uf de Rimwalk gange, also ganz uffe bim Canyon. Dodezue hämmer au wieder früeh ufstoh müesse. Mir sin denn die erschte uf em Parkplatz gsi und es isch fascht no dunkel gsi, wo mri uns uf de Ufstoeg gmacht hän. Obe hämmer denn paar Kangoroos gseh und ganz wiet über s'Land. Es isch schön gsi, wie sich denn alles wieder het afange rot färbe, wo d'Sunne ufgange isch. De "Spaziergang" isch ziemlich astrengend gsi, aber es isch es Wert gsi, wil ich ha nomol so viel verschiedenes gseh!! Mir sin denn am Nomidag ca. fünf Stund zrugg uf Alice Springs gfahre. Leider han ich Dingos verschlofe (han au nur mir passiere). Denn ha ich nomol e Nacht dört verbrocht, bevor es denn heime isch.

 

Min letschet Dag im Outback het nomol mitere Tour gstartet. Die isch vomene Aborigine gleitet gsi und sehr itneressant gsi. Er het uns nomol viel über d'Kultur und s'Lebe vo de Aborigines verzellt! Spöter hämmer denn au no binere Tanz und Gsangperformance vo Aborigines chönne zueluege. Isch no lässig gsi. Gli ha ich denn scho uf de Flughafe müesse und denn isch es wieder uf Sydney gange. Dört hani nomol e Nacht gschlofe und denn isch es uf Vierradatrieb-Tour gange....

 


 


1 Kommentar 21.4.07 11:02, kommentieren

Sydney

Nach Melbourne bi ich uf Sydney. Ich bi eigentlich ganz ufgregt gsi, doert ane z'go, wil ich sooo viel scho devo ghoert han, aber ich bi chli enttuescht gsi. Die Stadt isch zwar wuerklich super toll, aber fuer mi eleige isch es eifach z'gross gsi. Ich ha mir immer chli Sorge gmacht, dass ich verlore gang und ha mi drum au gar nit wuerklich getraut, wieter als bis zum Darling Harbour z'go, de isch nur 10 Minute vom Hotel weg gsi. Mi Hotel doert isch vergliche zu dem in Melbourne de Horror gsi. Ich frog mi, fuer was es drei Stern ka het. Viellicht fuer: loechriges Badtuech, luuti Naecht und spoti Wake up calls? Oder unfruendlichs Personal, kei offes Restaurant und ungmuetlichi Zimmer, wo meh an e Gfaengniszelle erinnere?? Naja, egal, ich has jo ueberlebt! :-)

Grad nach em Ichecke bi ich ins Sydney Aquarium. Doert ha ich unbedingt ane welle und ich bi so froh gsi, ha ich au Zyt ka. Es isch sehr interessant gsi, au wenn es gfluetet mit unruecksichtsvolle Koreaner gsi isch, und ich amigs richtig an d'Schiebe vo de Aquarie quaetscht worde bin. Es isch laessig gsi, nomol paar Fisch im Aquarium z'seh, wo ich bim schnrochle gseh han. Und was absolut toll gsi isch, isch de Haitunnel gsi. Ich find jo Haifisch mega interessant! Me het imene Tunnel choenne unterem Aquarium dure laufe und die schoene Tier beobachte choenne. Es isch so cooli, beruhigendi Musik doert gloffe, s'het super passt. Es isch mehr so gsi, als wuerde d'Hai ueber eim drueber schwebe. Ich haett ewigs choennte zueluege (wenn nit die Koreaner gsi waere...). Nach em Aquarium ha isch es imemr no z'frueh fuers z'Nacht gsi, also bi ich no nebe dra ins Wildlife World gange. Doert het me choenne Insekte alaenge und diversi australischi Tier bestune choenne. Ich bi froh gsi, sin die Spinne doert hinter Glaeser gsi, aber ich ha mi trotzdem fascht nit getraut se azluege. Ich waer mir sicher, d'Sarbina haett sich mega gfreut ka, oder?? :-) (bussi) es het doert au mega viel Schlange ka. Sogar die giftigschte vo de Welt, wo die meischte devo in Australie heimisch sin... Isch sehr interessant gsi!! Es het au so e Nachtdings ka, also wo me paar nachtaktivi Tier gseh het und das het mi au sehr fasziniert. No hets no so e Vogelvoliere ka und e Teil mit Schmetterlinge dinne, paar sin riesig gsi!! Und ganz obe, das Wildlife World isch zweistoeckig gsi, haen d'Wallabies gwohnt. Die haens ganz laessig ka, wil obe hets nur es Netz ka!

Denn am Dag druff ha ich d'City Sights Tour ka. Isch sehr interessant gsi, aber zum Teil het's eifach so viel Strosse, wo ueber de Stross sin, wo mir gfahre sin, so dass mir amigs gar nit wuerklich gseh haen, was es z'seh gaeh het!  Mir haen aber super Fotimoeglichkeit fuer s'Opera House und d'Harbour Bridge ka. S'Wetter isch au super gsi und es isch ca. 35 Grad heiss gsi. Das isch ganz untypisch zu dere Johreszyt fuer Sydney und zuedem isch es no humid gsi. (ich has toll gfunde, dass isch so wie in Airlie gsi :-)) Mir sin denn au no an de beruehmti Bondi Beach gange, aber leider haemmer z'wenig Zyt ka, zum go schwimme oder so. Uebere Mittag bi ich uf e Schiff und doert ha ich au no ganz tolli Foetteli vom Operea House choenne mache. Am Nomidag isch es denn chli in Norde gange, naemlich uf Manly. Doert waer ich gern go shoppe, s'het so vieli Surflaede ka und ha doch no Boardshorts brucht!! Naja, ha mir denn es Glace goennt, wo aber mehr eifach gschmelzt isch, als dass ich was devo ka haett. Bevor es wieter isch ha ich per Zuefall no wer vo de Schuel in Airlie atroffe am Strand, das het mi mega gfreut. ISch scho luschtig, wie klei die Welt isch!

Am noeggschte Dag bi ich uf de Blue Mountains Tour gsi. Ihr glaubet nit, wie kalt es gsi isch. Es isch 11 Grad gsi, also ganzi 24 Grad kaelter als am Dag devor!!! Und ich ha gmeint es wird en schoene Dag und bi denn hauptsaechlich am friere gsi... Es isch no e agnehmi Tour gsi. Zerscht simmer in e Wildlife Park. Doert het me Koalas choenne strichle und Wallabies fuettere und strichle. Ha denn au no choenne luege, wie s'Krokodil gfuetteret worde isch. Isch no laessig gsi de Park, aber er het recht alt und unpfelgt usgseh... Am Nomidag simmer denn in de Blue Mountains und bi de Three Sisters gsi. Das isch so e Gruppe vo Berge, oder halt Stei bim Berg und es seht recht aehnlich us. Es isch no e Gschicht dehinter, aber die schrieb ich jetzt nit do uf, weiss au nuem ganz, wie die gange isch, aber d'Aboriginals glaube, dass das mol drei Schwoeschtere gsi sin, wo vom Vater versteineret worde sin. Doert het me mit so Gondeli chli choenne in e Schlucht abe fahre und denn chli im Regewald laufe und mit der steilschte Bahn vo de Welt wieder choenne uffe fahre. Hui, es isch so steil gsi, das ich fascht usegfalle waer. Me cha sich nit guet doert hebe und es het kei Gurt oder so...

Das sin mini Erlebniss vo Sydney, wieter goht's denn mit em Bricht vo Alice und em Outback!

euri Sarah

 

1 Kommentar 16.4.07 09:30, kommentieren

Melbourne

 

Hallo zaemme!!

Do isch endlich min Bricht vo miner Reis. Ich fang am Afang a, naemlich mit Melbourne. Melbourne het mir sehr guet gfalle, s'isch eini vo mine Lieblingsstaedt worde. Es isch die zweitgroeschti Stadt vo Australie nach Sydney und es git do soooo viel z'gseh!! Wo ich doert gsi bi, isch grad d'Schwimmweltmeischterschaft gsi und diversi anderi Festivals und Sache sin gsi. Am Dag wo ich wieter greist bi, het grad d'Avalon Airshow agfange, wie gern waer ich doch bliebe und haett das gseh!! Es isch sehr viel trockener in Melbourne, als in de andere Orte, wo ich do z'Australie gseh han. S'gras isch praktisch ueberall bruun. Es isch aber erstuunlich, wie alli Gaerte doch sehr gruen sind und alles am bluehe isch!

Am Dag wo ich acho bi, ha ich zerscht mol gluegt, wo ich am noeggschte Dag ane muess go, fuer mini Tour. Ich ha das schnell gfunde und uf em Weg doert ane feschtgstellt, dass ich mich innere Shoppingstross befinde muess. Es het diversi Laede ka (sehr international) und verschiedeni Restaurants. Wil ich nonig grad zrugg ins Hotel ha wieder welle, bi ich zum Fluss gloffe und bi doert chli ane gsesse und ha d'Luet beobachtet wo uf em Yarra River gruederet haend. Spoeter bi ich denn go aesse und zrugg ins Hotel, wo eifach hammer gsi isch, richtig luxurioes :-)

Am noeggeschte Dag ha ich grad zwei Toure ka. Mit de City Sights Tour ha ich agfange. Doert simmer eifach durch d'Stadt gfahre immene Bus und haend d'Sache eso agluegt. Ich bi recht verwunderet gsi, wo mir bi soneme riese Memorial (Shrine of Remembrance) halt gmacht haend, wil ich nie mitbeko ha, das Australie in praktisch allne Krieg mitgwirkt ka het. Haend ihr das gwuesst?

Am Nomidag bi ich uf Phillip Island. Uf em Weg doert ane haemmer Pause gmacht ufere Farm, wo mir haen choenne Wallabies fuettere und saemtlichi australischi Tier haen choenne aluege. Unsere noeggschte Stop isch in soneme Koala Centre gsi. Doert ha ich denn s'erschtmol Koalas in freier Wildbahn gseh. Und es het wuerklich au vieli ka!! Unser noeggschet Halt isch denn unser Ziel gsi. Mir haen am Strand choenne d'Pinguin (jo, Australie het Pinguin!!) beobachte, wo vom Meer, nach em Sunneuntergang, zrugg zu ihrne Neschter gwaschlet sin. Es isch die kleinschti Pinguinart in de Welt und sie sin eifach sooo suess. Es seht richtig herzig us, wenn sie ufe z'watschle choemme, und ab und zue gheie sie um, wil ihre Buch ganz voll mit Fisch isch. Waehrend mir d'Pinguin beobachtet haen, ha ich denn endlich au mol s'Southern Cross, s'Sternzeiche wo uf de australische Flagge isch, gseh! :-) (Han das immer gsuecht ka)

An mim letschte ganze Dag in Melbourne ha ich d'Great Ocean Road Tour gmacht. Das isch unglaublich gsi!! Han ganz vieli schoeni Straend gseh und kleini Staedtli. Und denn ebbe au no die 12 Aposchtel, wo eigentlich nur no 8 sind, d'Loch Arch Gorge und d'London Bridge. Das sin eifach alles so Felse wo us em Wasser rage und eigentlich mol mit em Feschtland verbunde gsi sind! Es isch mega faszinierend und interessant. Vor allem seht meh au die Erdschichte, worus die Felse bestoehn.

Am noeggschte Dag isch es denn scho uf Sydney gange. Gern waer ich no laenger in Melbourne bliebe. Ich wird sicher mol wieder doert ane go. Es bruucht eifach mehr Zyt, als ich zur verfuegig ka han!

So, das isch min Melbourne-Bricht...

See you later

Sarah

1 Kommentar 16.4.07 09:01, kommentieren

Back in Brisbane

Hallo mini Liebe!

Ich meld mi zrugg vo miner Reis. Ich han in de letschte zwei Wuche sooooo viel erlebt. Es isch eifach wahnsinn gsi. Ich weiss gar nit, wo ich afange soell mit verzelle. Muend no chli warte... Ich cha euch nur saege, dass alles guet gange isch und ich es sehr gnosse han. Australie isch eifach es hammer genials Land und s'eleige Reise isch ueberhaupt kei Problem!! Jetzt bi ich wieder zrugg bi mine Verwandte in de noechi vo Brisbane, wo ich no fuer zwei Wuche blieb.

Ihr hoered gli vo mir!!

euri Sarah

 

1 Kommentar 4.4.07 05:37, kommentieren

Infos

 

Hallo zaemme!!

Scho wieder paar Daeg umme. D'Zyt goht sooo schnell verbi!! Ich bi jetzt no genau 1 Monet in Australie!! S'isch mir nonig bewusst, aber ich wird no s'beschte us dere Zyt mache und es gniesse. Ich freu mi scho, euch alli wieder z'seh!! Merked euch also de 19. April, wil denn bi ich wieder in de Schwiez!!

Ich bi letscht Wuche mit de Mutter vo miner Tante, de Jenny, go Brisbane aluege miteme Bus. Das isch mega interessant und laessig gsi. D'Stadt het sehr viel Hochhueser, aber au Hueser wo aelter ussehn und d'Architektur isch mega speziell... Zobe simmer denn nomol uf Brisbane gfahre, aber mit de ganze Familie usser mim Goetti und miner Tante mit em Baby. Mir haen denn am Brisbane River z'Nacht gaesse (Thai Take away: yummie) und d'Stadt mit de viele Liechtli bewunderet.

Am Frittig bi ich uf Surfers Paradise an d'Gold Coast. Doert ha ich chli Souvenier kauft, es isch alles viel guenstiger doert als an andere Ort und ich ha recht zuegschlage. Spoeter ha ich denn d'Eri troffe. Sie isch us Japan und ich ha sie in de Schuel kenneglernt in Airlie Beach, aber sie isch jetzt an d'Gold Coast zum schaffe. D'Eri und ich sin nit eleige gsi, es sin no zwei Kollege vo mir us de Schwiez dezue ko. Das isch mega komisch gsi, wil ich ha beidi scho sit Ewigkeite nuemme gseh!! Zobe bi ich denn wieder zu mim Goetti und miner Tante zoge, wo ich blieb bis ich heime gang.

Ich has mega gmuetlich jetzt und gniess es eifach Zyt z'verbringe mit miner aussie family! Ich muess jetzt aber scho wieder afange packe, wil ich am Zischtig fuer zwei Wuche gang go reise. Ich freu mi mega und bi gspannt, was uf mi zuechunnt. Ich wird also fuer zwei Wuche per Mail oder MSN nit erreichbar si. Meld mi denn aber so gli wie moeglich zrugg und wird Bricht ertsatte!! ;-)

Warmi Gruessli!!

euri Sarah

 

1 Kommentar 18.3.07 03:10, kommentieren